گنداواہ، فلسطینی عوام سے اظہار یکجہتی کیلئے ریلی برآمد
اشاعت کی تاریخ: 18th, April 2025 GMT
متعدد تنظیموں کیجانب سے جھل مگسی میں فلسطین اور پاراچنار کے عوام سے اظہار یکجہتی کیلئے ریلی نکالی گئی۔ اسلام ٹائمز۔ فلسطین اور غزہ میں جاری اسرائیلی مظالم کے خلاف اور مظلوم فلسطینی عوام سے اظہار یکجہتی کے لیے بلوچستان کے ضلع جھل مگسی کی تحصیل گنداواہ میں احتجاجی ریلی نکالی گئی، جس میں شہریوں کی بڑی تعداد نے شرکت کی۔ ریلی کا اہتمام مرکزی امام بارگاہ نقویہ، امامیہ اسٹوڈنٹس آرگنائزیشن پاکستان ضلع جھل مگسی، معرفت فاؤنڈیشن گنداواہ اور المہدی اسکاؤٹس کے اشتراک سے کیا گیا۔ ریلی کا آغاز مرکزی امام بارگاہ نقویہ سے ہوا جو پُرامن طریقے سے شاہی بازار تک پہنچی۔ شرکاء نے ہاتھوں میں فلسطینی پرچم، بینرز اور پلے کارڈز اٹھا رکھے تھے جن پر اسرائیلی جارحیت کے خلاف نعرے اور مظلومین فلسطین کی حمایت میں تحریریں درج تھیں۔ ریلی میں بچوں اور بزرگوں سمیت شہریوں کی بڑی تعداد نے شرکت کرکے اپنے جذبات کا بھرپور اظہار کیا۔ ریلی میں امامیہ اسٹوڈنٹس آرگنائزیشن پاکستان بلوچستان کے سابقہ صوبائی صدر اور قم کے طالب علم سید امانت نقوی، مجلس علماء مکتب اہلبیت کے ضلعی صدر مولانا علی نواز عرفانی اور معرفت فاؤنڈیشن کے جنرل سیکرٹری مولانا سعید احمد سعیدی نے خطاب کیا۔
مقررین نے اسرائیلی مظالم کی شدید مذمت کرتے ہوئے کہا کہ فلسطین محض ایک سرزمین نہیں بلکہ مزاحمت، مقاومت مظلومیت اور آزادی کا استعارہ ہے۔ انہوں نے کہا کہ عالمی برادری، خصوصاً مسلم ممالک کو فلسطینی عوام کی حمایت کے لیے سنجیدہ اور مؤثر اقدامات کرنے چاہئیں۔ ان کا کہنا تھا کہ اسرائیل کی کھلی جارحیت اور امریکہ و دیگر ممالک کی انسانی حقوق کی پامالی پر خاموشی اختیار کرنا بھی ظلم کا ساتھ دینے کے مترادف ہے۔ ریلی کے دوران فضاء مسلسل "اللہ اکبر"، "لبیک یا حسین"، "لبیک یا اقصیٰ"، "مرگ بر اسرائیل"، " مرگ بر امریکہ" اور "فلسطین زندہ باد" کے نعروں سے گونجتی رہی۔ اس موقع پر پاراچنار کے مومنین کے حق میں بھی آواز بلند کی گئی جہاں 8 ماہ سے راستے بند کرکے 7 لاکھ انسانوں کو محصور کیا گیا ہے۔ اشیاء خوردونوش اور ادویات کے نہ ملنے کی وجہ سے آئے دن راستوں کی بندش سے اموات ہو رہی ہیں لیکن ریاست کی خاموشی قابلِ تعجب ہے۔ شرکاء نے یہ عزم ظاہر کیا کہ جب تک فلسطینی عوام پر ظلم جاری ہے اور کہیں پر بھی انسانوں پر ظلم ہوگا ان کے حق میں اور ظالم کے خلاف آواز بلند کرتے رہیں گے۔
ذریعہ: Islam Times
کلیدی لفظ: فلسطینی عوام
پڑھیں:
فلسطین کے معاملے پر امت مسلمہ کو فیصلہ کن اقدامات کرنے ہوں گے ،اسپیکر ایاز صادق
فلسطین کے معاملے پر امت مسلمہ کو فیصلہ کن اقدامات کرنے ہوں گے ،اسپیکر ایاز صادق WhatsAppFacebookTwitter 0 19 April, 2025 سب نیوز
استنبول (سب نیوز)قومی اسمبلی کے اسپیکر ایاز صادق نے استنبول میں فلسطین کی حمایت میں ہونے والے اجلاس میں فلسطین سمیت دیگر ممالک کے اسپیکرز سے ملاقات میں کہا کہ پاکستان فلسطینیوں کے حق میں آواز بلند کرتا رہے گا اور امت مسلمہ کو اس معاملے پر فیصلہ کن اقدامات کرنے ہوں گے۔
ترکیے کے شہر استنبول میں فلسطین کی حمایت میں منعقدہ اجلاس میں اسپیکر قومی اسمبلی سردار ایاز صادق نے شریک ممالک کے اسپیکرز، پریذائیڈنگ افسران سے اہم ملاقاتیں کیں اور فلسطین کی تشویش ناک صورت حال سمیت باہمی دلچسپی کے دیگر امور پر تبادلہ خیال کیا گیا۔ اسپیکر قومی اسمبلی نے ترکیے کے اسپیکر کے فلسطین کے معاملے پر اہم اجلاس منعقد کرنے کے اقدام کو سراہا اور کہا کہ اجلاس کا مقصد فلسطینی عوام کے ساتھ عالمی یکجہتی کا اظہار تھا اور انہوں نے پاکستان کی فلسطینیوں کے ساتھ غیرمتزلزل حمایت کا عزم دہرایا۔
انہوں نے کہا کہ مسلم امہ کو فلسطین پر متحد ہو کر مشترکہ لائحہ عمل اپنانے کی ضرورت ہے، فلسطینیوں پر ریاستی دہشت گردی دنیا کے جدید اصولوں کے منافی ہے، فلسطین کے معاملے پر امت مسلمہ کو فیصلہ کن کرنے ہوں گے۔اسپیکر قومی اسمبلی ایاز صادق نے فلسطین کے اسپیکر سے ملاقات کی اور فلسطینی عوام سے یک جہتی کا اظہار کیا اور کہا کہ پاکستان کے عوام فلسطینی ماں، بچوں اور بزرگوں کا درد محسوس کرتے ہیں۔
ان کا کہنا تھا کہ پاکستان کے عوام کے دل فلسطینی عوام کے ساتھ دھڑکتے ہیں، پاکستان کی پارلیمان اور عوام مشکل گھڑی میں فلسطین کے عوام کے ساتھ کھڑے ہیں اور پاکستان فلسطینی عوام کی اخلاقی، سیاسی اور سفارتی حمایت جاری رکھے گا۔ایاز صادق نے کہا کہ پاکستان کی پارلیمان نے فلسطینیوں کے حق میں متعدد قراردادیں منظور کیں ہیں، اسرائیلی فورسز نے غزہ میں بربریت کا بازار گرم کر رکھا ہے، فلسطین کی حالت زار پر اقوام عالم کی مجرمانہ خاموشی سمجھ سے بالاتر ہے۔اس موقع پر فلسطین کے اسپیکر نے پاکستان کے فلسطینی عوام کے لیے دردمندانہ جذبات کو سراہا۔
اسپیکر قومی اسمبلی ایاز صادق نے ترکیہ کے ہم منصب سے بھی ملاقات کی اور فلسطین کی تشویش ناک صورت حال پر مشترکہ حکمت عملی پر زور دیتے ہوئے کہا کہ فلسطین میں انسانی المیہ جنم لے چکا ہے۔اماراتی ہم منصب سے ملاقات میں ایاز صادق نے فلسطین میں فوری جنگ بندی پر زور دیا، اسی طرح ملائیشیا کے ہم منصب سے ملاقات میں دونوں رہنماوں نے فلسطین پر پارلیمانی سطح پر تعاون پر اتفاق کیا۔اسپیکر ایاز صادق نے انڈونیشیا کے اسپیکر سے بھی ملاقات کی، جہاں اسلاموفوبیا پر اظہار تشویش اور فلسطینی عوام سے یکجہتی کا اظہار کیا گیا۔
انہوں نے کہا کہ مشترکہ کوششوں کے ذریعے اقوام عالم کو مظلوم اقوام کے حق خود ارادیت کے لیے بیدار کرنا پڑے گا، پاکستان پارلیمانی سفارت کاری کے ذریعے فلسطینیوں کے حق میں آواز بلند کرتا رہے گا۔
ایران میں قتل 8 پاکستانیوں کی لاشیں ابھی تک تفتان نہیں لائی گئیں، ڈی سی چاغی