اوورسیز کنونشن: تازہ ہوا کا جھونکا
اشاعت کی تاریخ: 16th, April 2025 GMT
اوورسیز پاکستانیوں کے حوالے سے خوش آئند پیشرفت ہوتی دکھائی دے رہی ہے۔ وطن سے دور بیرون ملک مقیم ان تارکین وطن کو سمندر پار پاکستانی بھی کہا جاتا ہے۔ وفاقی دارالحکومت میں سمندر پار بسنے والے پاکستانیوں کا اہم اجتماع شروع ہو چکا ہے۔ تین روزہ کنونشن تازہ ہوا کا جھونکا ثابت ہوا ہے۔ اوورسیز پاکستانی فائونڈیشن کے پلیٹ فارم سے اس کنونشن کے انعقاد کی کاوشیں کی گئی ہیں۔ حکومت پاکستان نے خندہ پیشانی سے سمندر پار پاکستانیوں کو خوش آمدید کہتے ہوئے پرتپاک میزبانی کا مظاہرہ کیا ہے۔ ایسا ہی ہونا بھی چاہیے۔ تارکین وطن کسی لحاظ سے بھی ملک میں مقیم شہریوں سے کم پاکستانی نہیں۔ سمندر پار پردیس میں بسنے والے ہر شہری کا دل اپنے آبائی وطن کی یاد میں دھڑکتا ہے۔ ہر سانس کے ساتھ اپنے وطن اور اعزا و اقارب کی یاد آتی ہے۔ ایک حدیث کے مطابق وطن کی محبت ایمان کا حصہ ہے۔ یہ پہلو ہمیشہ پیش نظر رہنا چاہیے کہ بیرون ملک مقیم شہریوں کی بڑی تعداد معاشی مجبوریوں کی باعث اپنے وطن اور اہل خانہ سے دوری کی صعوبت برداشت کر رہی ہے ۔ یہ وہ طبقہ ہے جس کے دل میں مادر ارضی کی محبت ہمیشہ موجزن رہتی ہے۔ مروجہ آئینی اور جمہوری اصولوں کے تحت ریاست اپنے شہریوں کے حقوق کی ضامن ہوتی ہے۔ تمام شہریوں کے بنیادی انسانی حقوق کا تحفظ ریاست کے اولین ذمہ داری ہے۔ عالمی سطح پر مسلمہ جمہوری اور سیاسی ضابطوں کے مطابق ہر ریاست اپنے شہریوں کو جرائم سے تحفظ، صحت کی سہولیات، جدید تعلیم، شفاف گورننس، باہمی مساوات، روزگار کے وافر مواقع ،معاشی ترقی اور شخصی آزادیوں کی فراہمی کی ذمہ دار ہوتی ہے۔ بیشتر ممالک نے منتخب نمائندوں کے ذریعے اپنے شہریوں کی فلاح و بہبود کے لیے جو رہنما اصول وضع کیے ہیں انہیں آئینی دستاویز کی صورت قانونی شکل دی ہے۔
واضح رہے کہ ہر ریاست اپنے ان شہریوں کے حقوق کی بھی ضامن ہوتی ہے جو کسی بھی وجہ سے کسی دوسرے ملک میں مقیم ہوتے ہیں۔ اس حوالے سے سمندر پار پاکستانیوں کے سہ روزہ کنونشن کا انعقاد نہایت اہمیت کا حامل ہے۔ دستیاب اطلاعات کے مطابق اس اجتماع میں مختلف وزارتیں سمندر پار مقیم شہریوں سے براہ راست رابطے میں رہیں گی ۔یہ نہایت مناسب اور منفرد اقدام ہے۔ ماضی میں سمندر پار پاکستانیوں کے مسائل کے حوالے سے زبانی جمع خرچ تو کیا جاتا رہا ہے لیکن عملی اقدامات پر مناسب توجہ نہیں دی جاسکی۔ بیرون ملک مقیم پاکستانی وطن عزیز میں گوناگوں مسائل کا سامنا کرتے چلے آرہے ہیں۔ ان مسائل کے فوری حل کے لیے اوورسیز پاکستانی فائونڈیشن نے ہمیشہ بھرپور انداز میں آواز اٹھائی ہے۔ تاہم عملی اقدامات اور مسائل کے حل کے لیے درکار جذبے کے فقدان کے باعث ماضی کی حکومتیں سمندر پر پاکستانیوں کی خاطر خواہ داد رسی نہیں کر سکیں۔ موجودہ حکومت اس لحاظ سے لائق تحسین ہے کہ اس نے بیرون ملک مقیم پاکستانی کمیونٹی سے با مقصد روابط کو استوار کرنے کے لیے سہ روزہ کنونشن کے پلیٹ فارم کو خصوصی اہمیت دی ہے۔ یہ اعلان بھی کیا گیا ہے کہ مستقبل میں بھی یہ کنونشن سالانہ بنیادوں پر منعقد کیا جاتا رہے گا ۔متعلقہ وزارتیں سمندر پار پاکستانیوں کے قانونی اور انتظامی مسائل کو حل کرنے کے لیے فوری اقدامات کا بندوبست کریں گی۔ ماضی میں بیرون ملک مقیم پاکستانی جائیداد کی خرید و فروخت سمیت رقوم کی آسان ترسیل کے حوالے سے فراڈ اور دھوکہ دہی کا شکار ہوتے رہے ہیں۔ جرائم پیشہ قبضہ مافیا، مالیاتی فراڈ کرنے والے نوسر باز اور جعلی رہائشی اسکیموں کی آڑ میں جائدادوں کی منتقلی کے حوالے سے لوٹ مار کرنے والے جرائم پیشہ گروہوں نے سادہ لوح سمندر پر پاکستانیوں کو محنت سے حاصل کردہ جمع پونجی سے محروم کیا۔ یہ سلسلہ فوری ختم ہونا چاہیے۔
قوی امید ہے کہ حالیہ کنونشن کے بعد حکومت پاکستان سمندر پار مقیم شہریوں کی تجاویز کی روشنی میں سنگین جرائم خصوصاً مالیاتی دھوکہ دہی کے سد باب کے لیے ٹھوس اقدامات اٹھائے گی۔ سمندر پار مقیم پاکستانیوں نے شدید اقتصادی بحران کے دوران ترسیلات زر کے ذریعے پاکستان کو مالیاتی دیوالیہ پن سے بچانے میں اہم کردار ادا کیا۔ گزشتہ تین سالہ اقتصادی و سیاسی عدم استحکام کے دوران سمندر پار مقیم پاکستانی برادری نے اپنی حب الوطنی پر آنچ نہیں آنے دی۔ بدقسمتی سے سابق حکمران جماعت تحریک انصاف کے بعض مفاد پرست مفرور عناصر نے اوورسیز پاکستانی برادری کو اپنے سیاسی مفادات کے لیے استعمال کرنے کی سازشیں کیں۔ تا ہم یہ وطن دشمن منصوبے مختلف مواقع پہ بے نقاب ہوتے رہے ہیں۔ وطن دشمن عناصر سہ روزہ کنونشن میں سمندر پار پاکستانیوں کی والہانہ شرکت پر تلملا رہے ہیں۔ سوشل میڈیا پر محب وطن سمندر پار پاکستانیوں کے خلاف مذموم پروپیگنڈا جاری ہے۔ سادہ لوح عوام پر مفاد پرست سیاسی گرگٹوں کی حقیقت عیاں ہوتی جا رہی ہے ۔ وقت کا تقاضہ ہے کہ ریاست اپنے سمندر پار پاکستانی شہریوں سے مستقل رابطے استوار کر کے سازشی عناصر کی بیخ کنی کرے۔ سہ روزہ کنونشن کے کامیاب انعقاد سے یہ واضح ہو گیا ہے کہ بیرون ملک مقیم شہری کسی سیاسی بہروپیے کے مرید بن کر انتشار پھیلانے کے بجائے پاکستان کے سفیر بن کر دنیا بھر میں حب الوطنی کی روشنی پھیلائیں گے۔
ذریعہ: Daily Ausaf
کلیدی لفظ: سمندر پار پاکستانیوں کے سمندر پار پاکستانی اوورسیز پاکستانی بیرون ملک مقیم سمندر پار مقیم مقیم پاکستانی مقیم شہریوں کے حوالے سے ریاست اپنے کنونشن کے رہے ہیں کے لیے
پڑھیں:
مہلت ختم، اقدامات سخت، پاکستان میں مقیم غیر قانونی، غیر ملکی اور افغان سٹیزن کے انخلا کا عمل مزید تیز
حکومت پاکستان کی جانب سے دی گئی مہلت ختم ہونے کے بعد پاکستان میں مقیم غیر قانونی، غیر ملکی اور افغان سٹیزن کارڈ ہولڈرز کے انخلا کا عمل تیزی سے جاری ہے۔ حکومت پاکستان کی جانب سے ان افراد کو ملک چھوڑنے کے لیے سخت اقدامات کیے جا رہے ہیں۔ گزشتہ روز 18 اپریل 2025 بروز جمعہ کو 5030 سے زائد غیر قانونی افغان باشندے پاکستان سے اپنے وطن افغانستان واپس روانہ ہوئے۔ سرکاری اعداد و شمار کے مطابق اب تک مجموعی طور پر 971,969 غیر قانونی افغان شہری پاکستان چھوڑ چکے ہیں۔ حکومتی حکام کے مطابق غیر قانونی رہائش پذیر افراد، غیر ملکیوں اور افغان سٹیزن کارڈ رکھنے والوں کے خلاف سخت قانونی کارروائی جاری ہے۔ تاہم، حکومتی ترجمان کا کہنا ہے کہ انخلاء کے عمل کو باعزت اور منظم انداز میں یقینی بنایا جا رہا ہے تاکہ کسی قسم کی بدسلوکی یا انسانی حقوق کی خلاف ورزی نہ ہو۔ مزید برآں، حکومتِ پاکستان کی جانب سے واپس جانے والے افراد کے لیے خوراک اور صحت کی معیاری سہولیات فراہم کی گئی ہیں تاکہ ان کے سفر اور واپسی کو سہل اور محفوظ بنایا جا سکے۔
بیرون ملک جانے سے متعلق عدالتی آرڈر نہ دکھایا تو اسد قیصر کی ضمانت خارج کردوں گا: اے ٹی سی جج