کراچی میں سمندری ہوائیں بند؛ شدید گرمی کب تک رہے گی؟
اشاعت کی تاریخ: 4th, April 2025 GMT
کراچی:
شہر قائد میں سمندری ہوائیں بند ہونے سے گرمی کی شدت بڑھ گئی، جس سے شہری بے حال ہو گئے۔
محکمہ موسمیات نے خبردار کیا ہے کہ بھارتی ریاست راجستھان پر موجود ہوا کے کم دباؤ کے باعث سمندری ہوائیں غیر فعال ہو چکی ہیں، جس کے نتیجے میں کراچی سمیت سندھ کے دیگر علاقوں میں گرمی کی شدت میں اضافہ ہو گیا ہے۔
موجودہ صورتحال میں بلوچستان کی گرم ریگستانی اور شمال مغربی ہوائیں ساحلی علاقوں پر اثر انداز ہو رہی ہیں۔
ترجمان نے بتایا کہ شہر قائد میں گرمی کی یہ لہر منگل تک برقرار رہنے کا امکان ہے، جب کہ آج سے اتوار تک درجہ حرارت 39 ڈگری سینٹی گریڈ سے تجاوز کر سکتا ہے۔ اس دوران صبح سے سہ پہر تک سمندری ہوائیں معطل رہنے کا امکان ہے، جس سے گرمی کا احساس مزید بڑھ جائے گا۔
تاہم محکمہ موسمیات کا کہنا ہے کہ پیر سے درجہ حرارت میں 2 سے 3 ڈگری کمی آنا شروع ہو جائے گی اور منگل یا بدھ تک زیادہ سے زیادہ درجہ حرارت دوبارہ 34 سے 35 ڈگری کے درمیان آ جائے گا، جس سے شہریوں کو کچھ حد تک ریلیف ملنے کی امید ہے۔
دوسری جانب 9 اپریل سے مغربی ہواؤں کا ایک نیا سلسلہ بلوچستان کے راستے پاکستان میں داخل ہوگا، تاہم کراچی میں اس کے تحت بارش کا کوئی امکان نہیں۔ البتہ سندھ کے دیہی علاقوں میں بعض مقامات پر ہلکی بارش متوقع ہے۔
ماہرین نے شہریوں کو ہدایت کی ہے کہ وہ موجودہ گرمی کی شدت کے پیش نظر دھوپ میں غیر ضروری نکلنے سے گریز کریں، پانی کا زیادہ استعمال کریں اور احتیاطی تدابیر اختیار کریں تاکہ ہیٹ ویو کے ممکنہ اثرات سے محفوظ رہا جا سکے۔
.ذریعہ: Express News
کلیدی لفظ: سمندری ہوائیں گرمی کی
پڑھیں:
کراچی میں ہیٹ ویو کا الرٹ، صبح سے شدید گرمی، پارہ کتنا رہے گا؟
کراچی:
محکمہ موسمیات نے کراچی کے موسم کے حوالے سے ایک بُری خبر کا الرٹ جاری کر دیا ہے۔
محکمہ موسمیات نے خبردار کیا ہے کہ کراچی میں آج سے ہیٹ ویو کا آغاز ہو چکا ہے، جس کے باعث شہریوں کو شدید گرمی اور حبس کا سامنا کرنا پڑے گا۔
ادارے کے مطابق موسم نہ صرف گرم بلکہ مرطوب بھی رہے گا، اور شہریوں کو احتیاطی تدابیر اختیار کرنے کی ہدایت دی گئی ہے۔
محکمہ موسمیات کے مطابق شہر کا موجودہ درجہ حرارت 27 ڈگری سینٹی گریڈ ریکارڈ کیا گیا ہے، جبکہ ہوا میں نمی کا تناسب 56 فیصد ہے، جو حبس کی شدت میں اضافے کا باعث بن رہا ہے۔
مزید پڑھیں: محکمہ موسمیات کی کراچی میں ہیٹ ویو کی پیشگوئی
ماہرین موسمیات کے مطابق دن کے اوقات میں درجہ حرارت 37 سے 39 ڈگری سینٹی گریڈ تک جا سکتا ہے۔ اس دوران ہواؤں کی رفتار 30 سے 35 کلومیٹر فی گھنٹہ تک بڑھنے کا امکان ہے، جبکہ اس وقت ہوا 9 کلومیٹر فی گھنٹہ کی رفتار سے چل رہی ہے۔
واضح رہے کہ محکمہ موسمیات پہلے ہی کراچی میں ہیٹ ویو کا الرٹ جاری کر چکا ہے، اور عوام سے اپیل کی گئی ہے کہ وہ بلا ضرورت گھروں سے باہر نہ نکلیں، دھوپ میں سفر سے گریز کریں، پانی کا زیادہ استعمال کریں اور گرمی سے بچاؤ کی دیگر تدابیر اختیار کریں۔
Tagsپاکستان
بیرون ملک جانے سے متعلق عدالتی آرڈر نہ دکھایا تو اسد قیصر کی ضمانت خارج کردوں گا: اے ٹی سی جج