نفرت انگیزی کا مرض اور ولی دکنی کا مزار
اشاعت کی تاریخ: 30th, March 2025 GMT
ہندوستان میں انتہاپسند مطالبہ کررہے ہیں کہ مغل شہنشاہ اورنگزیب عالمگیر کی قبر مسمار کردی جائے، پہلے بھی ایسی آوازیں اٹھتی رہیں لیکن فلم ‘چھاوا’ ریلیز ہونے کے بعد ان میں شدت آگئی ہے۔ اس فلم میں مغل بادشاہ اورنگزیب کو ایک سفاک ولن کے روپ میں پیش کیا گیا ہے۔
ہندوستان کی تاریخ میں اورنگزیب کے کردار پر بحث نئی نہیں لیکن فلم ‘چھاوا’ کی ریلیز کے بعد اس بحث کو سیاسی اور مذہبی رنگ دیا جارہا ہے۔ اسے بنیاد بنا کر نفرت انگیزی کا بازار گرم ہے اور کہیں کہیں تو نوبت پُرتشدد مظاہروں تک جا پہنچی ہے۔ ناگپور میں مشتعل افراد کے جلاؤ گھیراؤ کے بعد گزشتہ دنوں کرفیو لگانا پڑا اور مہاراشٹر کے وزیراعلیٰ دیوندر فڈنویس نے فرمایا: ‘اورنگزیب کی تعریف کرنے والوں کے خلاف قانونی کارروائی کی جائے گی۔’
مودی سرکار فلم ‘چھاوا’ کی پشت پناہی کررہی ہے جس کے بعد نفرت کی یہ تازہ لہر اٹھی ہے۔ قرائن اور بی جے پی کے ماضی کو ذہن میں رکھا جائے تو اب کی بار بھی وہ اس کشیدگی سے سیاسی فائدہ کشید کرے گی۔
اورنگزیب کے مقبرے کے ڈھانے سے متعلق خبریں پڑھ کر مجھے 2002 میں نریندر مودی کے زیرِ نگیں گجرات میں منظم مسلم کش فسادات کا خیال آیا جس میں ہندو بنیاد پرستوں نے احمد آباد میں اردو غزل کے بنیاد گزار شاعر ولی دکنی کا مزار منہدم کرکے دم لیا تھا۔ ولی کی یہ یادگار شہر کی ادبی اور ثقافتی زندگی کا مظہر تھی۔ فروری 2002 میں پیش آنے والا یہ قابلِ مذمت اور افسوس ناک واقعہ فکشن اور نان فکشن کا موضوع بنا جس کے بہت سے حوالے میرے ذہن میں محفوظ ہیں۔
ان فسادات پر نندتا داس کی فلم ‘فراق’ بھی کبھی نہیں بھولتی جس میں ولی کےمزار کے انہدام کے مسئلے کو ایک ارادت مند کی جذباتی وابستگی کی نظر سے دیکھا گیا ہے۔
فکشن کی جہاں تک بات ہے تو سب سے پہلے ارندھتی رائے کے ناول ‘بے پناہ شادمانی کی مملکت’ کی طرف دھیان جاتا ہے جسے معروف مترجم ارجمند آرا نے نہایت کامیابی سے اردو میں منتقل کیا ہے۔ یہ ترجمہ پہلی مرتبہ 2018 میں ادبی جریدے ‘آج’ کے خصوصی شمارے(103) میں شائع ہوا تھا۔
ناول میں دلی کے مشہور ہیجڑے انجم کی حضرت نظام الدین اولیا سے عقیدت کا تذکرہ ہے جو اپنے والد کے دوست ذاکر میاں کے ساتھ اجمیر شریف اور پھر وہاں سے احمد آباد میں ولی دکنی کے مزار کی زیارت کا پروگرام ترتیب دیتی ہے۔
انجم کے والد، ملاقات علی ولی دکنی کے بڑے مداح تھے۔
انہیں ولی کا یہ شعر بہت پسند تھا :
جسے عشق کا تیر کاری لگے
اسے زندگی کیوں نہ بھاری لگے
ناول میں صرف ایک شعر ہے یہاں اس غزل کے مزید شعر دیکھیے:
نہ ہووے اُسے جگ میں ہرگز قرار
جسے عشق کی بے قراری لگے
ہر اک وقت مجھ عاشق پاک کوں
پیاری تری بات پیاری لگے
ولی کوں کہے تو اگر یک بچن
رقیباں کے دل میں کٹاری لگے
انجم اور ذاکر میاں اجمیر سے احمد آباد روانہ ہوئے تو گجرات میں دنگے شروع ہوگئے تھے جن کے بیان میں ولی کے مزار کی توہین کاواقعہ بھی ناول میں آجاتا ہے:
‘ولی دکنی کا مزار منہدم کرکے برابر کردیا گیا ہے اور اس کے اوپر تارکول کی سڑک بنا دی گئی ہے، ایسی ہر نشانی مٹا دی گئی ہے جس سے یہ پتا چل سکے کہ اس کا کوئی وجود بھی تھا۔ پولیس، جنونی ہجوم اور وزیراعلیٰ اس کا کیا کرتے کہ لوگ اب بھی آ آ کر تارکول کی سڑک کے بیچوں بیچ، جہاں مزار ہوا کرتا تھا، پھول چڑھا جاتے تھے۔ جب تیز دوڑتی کاروں کے نیچے کچل کر پھول پس جاتے تو پھر سے نئے پھول نمودار ہو جاتے۔ پائمال پھولوں اور شاعری کے بیچ جو تعلق ہے، اس کا کوئی کر بھی کیا سکتا ہے؟’
یہ تو تھی فکشن کی بات، اب ارندھتی رائے کے نان فکشن سے رجوع کرتے ہیں اور اس کے لیے بھی ہمیں ‘آج’ کے 23 سال پرانے پرچے کے اوراق پلٹنا ہوں گے جس میں گجرات کے فسادات پر ان کے مضمون کا اجمل کمال کے قلم سے ہونے والا ترجمہ شامل ہے۔ اس تحریر میں ولی کے مزار کے ساتھ ساتھ استاد فیاض علی خاں کے مقبرے کی بے حرمتی کا تذکرہ بھی ہے:
‘احمد آباد میں اردو غزل کے بانی ولی گجراتی کے مزار کو مسمار کر کے رات بھر میں اس کے اوپر ایک سڑک تعمیر کردی گئی۔ موسیقار استاد فیاض علی خاں کے مزار کی بے حرمتی کی گئی اور اس کو جلتے ہوئے ٹائروں سے ڈھک دیا گیا۔ آگ لگانے والوں نے دکانوں، مکانوں، ہوٹلوں، ٹیکسٹائل ملوں، بسوں اور پرائیوٹ کاروں کو آگ لگائی اور انہیں لوٹا، لاکھوں افراد اپنے روز گار سے محروم ہو گئے۔’
اجمل کمال کے ‘آج’ سے اب ہم آصف فرخی کے ‘دنیا زاد’ کی طرف چلتے ہیں۔
اس کے شمارہ نمبر سات (2002) میں گجرات کے فسادات سے متعلق خوشونت سنگھ کے کالم کا ترجمہ آصف فرخی نے ‘ولی کی جلاوطنی’ کے عنوان سے کیا تھا، اس میں سے ایک ٹکڑا ملاحظہ کیجیے:
’28 فروری 2002 کو مسلمانوں کے خون کے پیاسے ایک ہجوم نے ولی گجراتی کی درگاہ کو جلا کر راکھ کر دیا۔ شہری بلدیہ نے اس کے اوپر تارکول کی پختہ سڑک بچھا دی کہ اس کا نام و نشان تک مٹ جائے لیکن آج بھی ٹیکسی اور بس کے ڈرائیور اس کے اوپر سے گزر جانے کے بجائے گھوم کر جاتے ہیں کہ ان صوفی بزرگ اور شاعر کی قبر کے اوپر سے نہ جانا پڑے جس کا احترام ان کے آباؤ اجداد بھی کیا کرتے تھے اور اس مزار کی بے ادبی سے ان پر بربادی نہ آجائے۔’
خوشونت سنگھ نے سیدہ حمید کی سربراہی میں 6 خواتین پر مشتمل فیکٹ فائنڈنگ مشن کی رپورٹ کا حوالہ دیا ہے جس کا آغاز ولی گجراتی کے مقبرے کی تاراجی سے ہوتا ہے اور اختتام ڈبلیو بی ییٹس کی نظم ‘دی سیکنڈ کمنگ’ کی ان سطروں پر:
Things fall apart; the centre cannot hold;
Mere anarchy is loosed upon the world,
The blood-dimmed tide is loosed, and everywhere۔
The ceremony of innocence is drowned;
The best lack all conviction, while the worst
Are full of passionate intensity.
دنیا زاد کے اسی شمارے میں ہریش میندر کا فسادات کے بارے میں درد مندی سے معمور مضمون ‘اے وطن عزیز گریہ کر’ قاری کو رنج میں مبتلا کر دیتا ہے۔
ولی دکنی کے مزار کی مسماری پر ‘گجراتی لیکھک منڈل’ نے بھی سخت احتجاج کیا اور اپنے ایک مشترکہ بیان میں مزار کی از سر نو تعمیر کا مطالبہ کیا۔ اس بیان میں ولی کے مزار کو ہندوستان کی تہذیبی روایت اور ادب کی قابلِ فخر علامت قرار دیا گیا تھا۔ انجمن ترقی اردو (ہند) کے رسالے اردو ادب (2002) نے یہ بیان سرورق پر شائع کیا تھا۔
ادبی حوالوں سے گزر کر اب ہم نندتا داس کی فلم ‘فراق’ پر آجاتے ہیں جس نے گجرات کے فسادات کی ہولناکی کو مجسم کردیا ہے۔ لوگوں کے ذہنوں میں مچی ہلچل، خوف اور بداعتمادی کی عمدہ تصویر کشی کی۔
‘فراق’ میں نصیر الدین شاہ ایک مسلمان گائیک کے روپ میں سامنے آتے ہیں جنہیں ولی دکنی سے محبت ہے۔ وہ ان کے مزار کے ڈھے جانے سے بے خبر ہیں۔ ایک دن وہ رکشے میں اپنے ملازم کے ساتھ اس سڑک سے گزرتے ہیں تو مزار کو سڑک پر نہ پاکر وہ رکشے والے سے رکشہ روکنے کو کہتے ہیں اور نیچے اتر کر کہنے لگتے ہیں:
‘ مزار کہاں گیا’
‘ارے ولی کا مزار یہیں تھا’
‘ولی کا مزار۔۔۔ یہیں تھا ‘
‘نہیں نہیں۔۔۔ میں بھول ضرور جاتا ہوں لیکن وہ مزار یہیں تھا۔۔۔ ایسے کیسے غائب ہوگیا۔’
رکشے والا اصل بات بتاتا ہے تو خان صاحب کا ملازم اسے چپ کروا دیتا ہے اور کہتا ہے کہ ولی کا مزار دوسری سڑک پر ہے۔ وہ خان صاحب کو صدمے سے بچانے کی خاطر غلط بیانی سے کام لیتا ہے۔ خان صاحب عجب بے یقینی کے عالم میں وہاں سے روانہ ہوتے ہیں۔
فلم میں ایک ہندو ڈاکٹر خان صاحب کا قدردان ہے، اسے وہ ایک دن ولی کے مزار پر اکتوبر 1960 میں پہلی دفعہ جانے کا قصہ سناتے ہیں۔ اس دن جم کر بارش ہوئی تھی اور پنڈت جی اور خان صاحب نے ریڈیو اسٹیشن پر راگ ملہار گایا تھا۔ پنڈت جی بضد ہوئے کہ وہ خان صاحب کو گھر پہنچا دیں گے۔ راستے میں انہوں نے ولی کے مزار پر اچانک سکوٹر روک لیا اور لگے ولی کو گانے۔
کوچۂ یار عین کاسی ہے
جوگئی دل وہاں کا باسی ہے
اور وہ ولی کی شاعری میں کھو گئے جس کا مزار برسات سے دھلا اور چاندنی سے نہایا ہوا تھا۔
وہ اپنے ارادت مند ڈاکٹر کو بتاتے ہیں کہ جب بھی وہ مزار کے پاس سے گزرتے تو فاتحہ ضرور پڑھتے تھے، باتوں باتوں میں ڈاکٹر کہتا ہے کہ ولی کے مزار کو جب توڑا گیا تو اس نے پیپر میں ان کے بارے میں پڑھا، اب ان پر وہ حقیقت آشکار ہوتی ہے جس کو ان کے ملازم نے ان سے چھپایا تھا اور خان صاحب یہ کہہ کر رہ جاتے ہیں: ‘مجھے معلوم تھا، مجھے معلوم تھا، صحیح جگہ پہ تھے۔’
مذکورہ بالا مثالوں سے ہم انتہا پسندوں کے مائنڈ سیٹ کو سمجھ سکتے ہیں جن کی غارت گری سے نہ جیتے جاگتے انسان محفوظ ہیں اور نہ ہی قبریں۔
اورنگزیب عالمگیر کے طرزِ حکمرانی کی بنیاد پر ان کی قبر کی بنیادیں ہلانے کے خواہشمند ہندوتوا کے پروانے صرف مغل حکمرانوں اور ان سے منسوب علامتوں کے درپے نہیں بلکہ فن شعر و موسیقی کی اقلیم کے وہ بے تاج بادشاہ بھی ان کے حملوں کی زد میں آئے جنہوں نے عوام کے دل و دماغ پر حکمرانی کی تھی۔ اس لیے انہوں نے ماضی میں ولی کے مزار پر دھاوا بولا اور استاد فیاض علی خاں کی قبر پر نفرت اور آگ کے شعلے بھڑکائے۔
گجرات کے سانحہ پر اہل دانش کے ردعمل سے ہم پاکستانی ظلم کے ضابطوں کے خلاف اپنی آواز کو پوری شدت اور مؤثر انداز میں اٹھانے کا چلن سیکھ سکتے ہیں۔ غور طلب بات یہ ہے کہ جان جوکھوں میں ڈال کر فسادیوں کی مذمت ان لوگوں نے کی جو مسلمان نہیں تھے، تعصبات سے بالاتر ہو کر مظلوموں کی ہم نوائی کرنا شرف انسانی ہے۔ المیہ یہ ہے کہ ہمارے ہاں اقلیتوں سے ناانصافی پر عموماً خاموشی میں عافیت سمجھی جاتی ہے، البتہ دوسرے ملکوں کی اختلافی آوازیں ہمیں اچھی لگتی ہیں۔
اس مصلحت کوشی میں ہم یہ بھی فراموش کردیتے ہیں کہ فرقہ پرست اور اقلیت دشمن گروہ کسی کے سگے نہیں ہوتے، وہ جہاں بھی ہوں، بظاہر کوئی ایک طبقہ ان کی زد میں ہوتا ہے لیکن وہ نفرت کا ایسا الاؤ بھڑکاتے ہیں کہ پورا معاشرہ جہنم بن جاتا ہے، انسانیت کے ان مجرموں کی حرکتوں کا اثر دور رس ہوتا ہے، ان کی دست برد پر ایک وقت میں خاموش رہنے والے کسی دوسرے وقت ان کا شکار بن جاتے ہیں۔
اس کی کئی مثالیں پاکستان سے بھی پیش کی جا سکتی ہیں کہ کس طرح جتھوں اور نان اسٹیٹ ایکٹرز کا ساتھ دینے والے ادارے اور افراد خود ان انتہا پسندوں کا نشانہ بنے جن کی کبھی انہوں نے سرپرستی کی تھی۔ انتہا پسندوں کی کارروائیاں ہوں یا ریاست کی چیرہ دستیاں ان کے بارے میں چپ سادھ لینے والے گھاٹے میں رہتے ہیں کیوں کہ جلد یا بدیر ایسے عناصر کی بھڑکائی ہوئی آگ کسی نہ کسی صورت ان تک ضرور پہنچتی ہے، اس صورت حال کو احمد مشتاق نے ایک شعر میں بیان کیا ہے:
اب جو اوروں پہ چمکتا ہے تو چپ رہتے ہو
اسی خنجر کو قریبِ رگِ جاں دیکھو گے
ہندوستان کے گجرات کا ذکر ہو تو مجھے اپنے پسندیدہ نقاد وارث علوی کی یاد ضرور آتی ہے جنہوں نے احمد آباد میں رہ کر اردو تنقید کو باثروت بنایا۔ وہ فرقہ وارانہ اور فسادات کی سیاست پر گہری نظر رکھتے تھے۔ بستیوں، مقبروں اور انسانی جانوں کو سیاست و اقتدار کی بھینٹ چڑھانے والوں کی ذہنیت کو وارث علوی نے برسوں پہلے اپنے ایک مضمون ‘فسادات اور فن کار’ میں بیان کیا تھا جو آج بھی حسب حال ہے:
‘یہ آج کے دور کا میکیاولی جو ہر قسم کے تخیلی، تخلیقی، روحانی اور جمالیاتی احساس سے محروم ہے، نہایت بے دردی اور بے رحمی سے اپنے فاشی تصورات کی بلی پر ہزاروں بے گناہ انسانوں کو قربان کروا سکتا ہے۔ اور اپنے اقدامات کے جواز میں یہ دلیل پیش کرسکتا ہے کہ ان کی موت، ان کے غلط تصورات اور غلط سیاسی اقدامات کا نتیجہ ہے۔ اس آدمی کو ذرا غور سے دیکھو یہ جلی ہوئی بستیوں میں جاکر اشک باری نہیں کرتا۔ یہ سن کر اس کا کلیجہ نہیں پھٹ جاتا کہ دو ہزار آدمی بے دردی سے مار دیے گئے۔ تین ہزار مکانات جلا دیے گئے۔ نہیں وہ ٹاﺅن ہال میں جاکر تقریر کرتا ہے اور عورتوں اور بچوں کے قتل کا سبب فارسی رسم الخط، اردو زبان، چار شادیاں، تغلق اور غوری سلاطین، سرسید احمد خان، خلافت تحریک اور برقع کی رسم میں تلاش کرتا ہے۔ اس آدمی کو غور سے دیکھو کیوں کہ یہ آج کل بہت سی کتابیں اور مضامین لکھ رہا ہے جن میں پوری ایک قوم کی تاریخ مسخ کرکے اسے یہ احساس دلانے کی کوشش کررہا ہے کہ اسے جو کچھ برداشت کرنا پڑ رہا ہے، وہ نتیجہ ہے اس کے پرکھوں کی حماقتوں اور انسانیت سوز حرکتوں کا۔ یہ آدمی جو آج کروڑوں انسانوں میں خوف، ناپائیداری اور بے چینی پیدا کررہا ہے، دوسرے انسانوں کے دکھ درد محسوس کرنے کی صلاحیت کھو بیٹھا ہے۔ اسے اقتدار پسندی اور سیاسی تصورات نے پاگل کردیا ہے۔ ‘
ادارے کا کالم نگار کی رائے کے ساتھ متفق ہونا ضروری نہیں ہے۔
آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں
گزشتہ دو دہائیوں سے مختلف قومی اور بین الاقوامی میڈیا اداروں سے وابستہ ہیں۔ کتابوں میں 'شرفِ ہم کلامی 2017'، 'لاہور شہر پُرکمال 2020'، 'گزری ہوئی دنیا سے 2022' اور 'شمس الرحمٰن فاروقی ,جس کی تھی بات بات میں اک بات' شائع ہو چکی ہیں۔
wenews اقلیتوں پر ظلم انتہاپسندی اورنگزیب عالمگیر بھارت پاکستان فلم چھاوا مغل بادشاہ مقبرہ مودی سرکار ولی دکنی کا مزار وی نیوزذریعہ: WE News
کلیدی لفظ: اقلیتوں پر ظلم انتہاپسندی اورنگزیب عالمگیر بھارت پاکستان فلم چھاوا مغل بادشاہ مودی سرکار ولی دکنی کا مزار وی نیوز ولی دکنی کا مزار میں ولی کے مزار اس کے اوپر کے مزار کی گجرات کے جاتے ہیں مزار کے مزار کو کے ساتھ اور ان اور اس کی قبر ہے اور ہیں کہ ولی کا کے بعد
پڑھیں:
حادثہ ایک دم نہیں ہوتا
کسی شاعر نے توکہا تھا کہ
وقت کرتا ہے پرورش برسوں
حادثہ ایک دم نہیں ہوتا
مگر حادثہ کا شکار ہونے والوں سے جب پوچھا جاتا ہے تو وہ بتاتے ہیں کہ اْنہیں تو پتہ ہی نہیں چلا ، اگر اْنہیں علم ہوتا کہ اْن کے ساتھ کوئی حادثہ ہونے والا ہے تو وہ گھر سے نکلتے ہی نہیں جبکہ اْسی حادثے میں جو لوگ کچھ بتانے کی پوزیشن میں نہیں ہوتے اْن کے لواحقین بتاتے ہیں کہ اِس حادثے میں زخمی ہونے یا جان بحق ہونے سے پہلے اْنہوں نے کتنے جتن کئے تھے اور وہ کون کون سی رکاوٹ پھلانگ کر حادثے کا حصہ بنے تھے ۔ بہرحال اللہ تعالی ہم سب کو ہر قسم کے حادثے سے محفوظ رکھے۔
پرانے زمانے میں حادثات کی خبروں کے حصول کا واحد ذریعہ اخبارات ہوتا تھا اور عموما صفحہ اول پر ہی ٹریفک حادثات کی خبریں شائع ہوا کرتی تھیں۔ آج کے برعکس ریڈیو اور ٹی وی پر ایسی خبریں نشر نہیں ہوتی تھیں۔ آج تو معمولی سے معمولی حادثے کی خبر بھی ٹی وی پر دیکھی اور سنی جا سکتی ہے۔ لوگ پوری ذمہ داری اور دلچسپی کے ساتھ وہ خبریں دیکھتے بھی ہیں اور ساتھ ساتھ یہ تبصرہ بھی کرتے ہیں کہ اگر یہ خبر نشر نہ کرتے تو کیا حرج تھا ۔
چند سال پہلے تک صورتحال یہ تھی کہ کوئی ٹریفک حادثہ ہونے کے بعد یہ طے کرنا مشکل ہوتا تھا کہ حادثہ کس کی غلطی کی وجہ سے ہوا ہے، جبکہ آج یہ بات طے کرنا مشکل نہیں رہا کہ حادثے کا اصل ذمہ دار کون ہے ۔ کیونکہ اکثر گاڑیوں میں لگے کیمرے یہ راز کھول دیتے ہیں اور اگر کسی گاڑی میں کیمرہ نہ بھی ہو تو آس پاس کے کلوز سرکٹ کیمرے یہ راز فاش کر دیتے ہیں۔ اس سب کے باوجود بھی آج بھی ایسے کئی حادثات ہوتے رہتے ہیں جن کے ذمہ داروں کا تعین نہیں کیا جا سکتا یا نہیں ہو پاتا ۔( خصوصا ہمارے ہاں)
شدید دھند کے موسم میں ہمارے ہاں تو بے شک موٹرویز اور ایکسپریس ویز بند کر دی جاتی ہیں مگر کئی ممالک میں ایسا کرنا ممکن نہیں ہوتا تاہم ڈرائیورز کو بہت زیادہ محتاط رہنے کی تلقین کی جاتی ہے ، مگر پھر بھی حادثات ہو ہی جاتے ہیں ۔ اس صورتحال میں عموماً غلطی تو کسی ایک ڈرائیور کی ہوتی ہے مگر اْس کے پیچھے آنے والے کئی ڈرائیورز اِس سے متاثر ہو جاتے ہیں۔ اچانک بریک لگانے سے پیچھے آنے والی گاڑیاں ایک دوسرے میں دھنستی چلی جاتی ہیں ۔ امریکہ کی ریاست لوزیانہ کی ہائی وے پر چند سال پہلے ایسی صورت میں چند منٹوں میں کم از کم ڈیڑھ سو سے زیادہ گاڑیاں ایک دوسرے میں دھنس جانے کی وجہ سے سات افراد جان بحق ہو گئے۔
شدید سردی کے موسم میں جبکہ دھند کے باعث حدِ بصارت بہت کم ہو جاتی ہے تو ایسے میں موٹرویز تو بند ہو جاتی ہیں مگر ہائی ویز پر ٹریفک کا دباؤ پہلے سے بھی زیادہ ہو جاتا ہے اور وہاں حادثات کی شرح خاصی بڑھ جاتی ہے ۔ ایسے میں زیادہ تر حادثات رات کے وقت ہوتے ہیں جب ڈرائیور کو یہ اندازہ کرنے میں غلطی لگ جاتی ہے کہ اْسے کہاں سے مڑنا ہے۔ ایسے میں وہ بعض اوقات گاڑی کو سڑک کے درمیان بنی دیوار سے ٹکرا دیتا ہے ۔ بعض اوقات اچھے خاصے خوشگوار موسم میں جب سب کچھ ٹھیک ٹھاک چل رہا ہوتا ہے تو کوئی جانورکسی بھی طرح سے موٹروے کی ’سیر و سیاحت‘ کے لیے آ جائے تو اْس سے بچنے یا اْس کو بچانے کے لیے ڈرائیور یکدم بریک لگا دیتا ہے تو اِس سے بھی اْس کے پیچھے آنے والی گاڑیاں اْس میں آ کر لگنے لگتی ہیں ۔
ہمارے ہاں ٹریفک حادثات کو مقدر کا لکھا ہی تصور کیا جاتا ہے، بہت پہلے جبکہ موٹرویز ، ایکسپریس ویز اور ون ویز نہیں ہوتی تھیں اور ایک ہی سڑک پر دونوں اطراف سے گاڑیاں آ جا رہی ہوتی تھیں تو سامنے سے آنے والی گاڑی کو دیکھ کر زبان پر بے ساختہ کلمہ طیبہ کا ورد شروع ہو جاتا تھا ۔ اْس وقت دوسرے شہر جانے کے لیے زیادہ تر لوگ بسوں پر ہی سفر کیا کرتے تھے۔ سنگل سڑک پر اوورٹیک کرتے ہوئے یا سامنے سے آنے والی ٹریفک سے بچتے ہوئے بعض اوقات بس بے قابو ہو کر سڑک سے نیچے اْتر جاتی اور سامنے آئے کسی درخت سے ٹکرا کر رک جاتی ۔ ایسے ہی کسی حادثے میں بچ جانے والی ایک بڑھیا نے ڈرائیور سے سوال کیا ؛ "بیٹا جہاں درخت نہیں ہوتے، تم بس کو کیسے روکتے ہو؟‘‘۔
اْن دنوں میں زمینی علاقوں میں سفر پہاڑی علاقوں میں سفر کی نسبت زیادہ محفوظ ہوتا تھا۔ پہاڑی راستے چونکہ تنگ اور بل کھاتے ہوئے جاتے ہیں ، اِس لیے وہاں پر گاڑی چلانے کے لیے اضافی مہارت کی ضرورت ہوتی تھی ، بلکہ آج بھی ہے۔ ایسے میں معمولی سی غفلت گاڑی کو کہیں سے کہیں پہنچا دیتی تھی۔ پہاڑوں میں بل کھاتی سڑکوں کے کسی موڑ سے نیچے کھائی کی طرف دیکھیں تو کوئی گری ہوئی گاڑی یا بس نظر آ جاتی ہے۔
پرانے زمانے میں تو بسیں ہی گری ہوئی نظر آتی تھیں مگر اب کاریں ، خصوصاً چھوٹی اور کم طاقت والی کاریں گرتی ہیں خصوصاً جن کے ڈرائیورز نا تجربہ کار ہوتے ہیں ۔ ایسی گاڑیاں اگر ناقابل مرمت ہوں یا اْن کی ملکیت کا کوئی دعوی دار نہ ہو تو متعلقہ ادارے ایسی گاڑیاں کھائی سے نکال کر کسی ایسی جگہ رکھ دیتے ہیں کہ جہاں ہر آنے جانے والے ڈرائیور کی نظر پڑے اور وہ اْس گاڑی کی حالت سے عبرت پکڑتے ہوئے محتاط ڈرائیونگ کرے مگر اِس کے باوجود بھی جو حادثات رونما ہونا ہوتے ہیں ہو کر ہی رہتے ہیں ۔
گاڑیوں کی ریس کو دنیا کا مہنگا ترین کھیل تصور کیا جاتا ہے کیونکہ اِس میں استعمال ہونے والی عام سی گاڑی بھی پاکستانی کرنسی کے اعتبار سے کئی کروڑ روپے کی ہوتی ہے اور اْس میں بیٹھے ڈرائیور کی زندگی کی کیا قیمت ہو گی ،آپ خود اندازہ لگا لیں ۔ پھر بعض اوقات ایسا بھی ہوتا ہے کہ یہ کروڑوں کی گاڑی دوسری مرتبہ ریس میں حصہ لینے کے قابل بھی نہیں رہتی۔ ایسے میں بعض اوقات تو دہرا نقصان بھی ہو جاتا ہے کہ ایک تو کار بیکار ہو گئی اور دوسرا اعزاز بھی ہاتھ نہیں آیا ۔ منظم کار ریس میں عام طور پر نقصان کار کا ہی ہوتا ہے، ڈرائیور بہرحال محفوظ ہی رہتا ہے۔ یہ ریس شائقین کو دکھانے کے لیے عام طور پر مختلف کیمروں کی مدد سے بڑی سکرینوں کا سہارا لیا جاتا ہے ۔
بعض اوقات اِس کی فلم بندی میں مصروف فوٹوگرافر کسی حادثے کی صورت میں ڈرائیورز سے زیادہ زخمی ہو جاتے ہیں ۔ عام لوگ دوران ریس گاڑیوں کے اْلٹنے اور ٹوٹنے کے مناظر سے بہت لطف اندوز ہوتے ہیں۔ اْن کا لطف بے شک ویسا ہی ہوتا ہے جیسا ریسلنگ، فٹبال ، کرکٹ یا کسی بھی میچ کے دوران شائقین کا ہوتا ہے۔ گاڑیوں کے اْلٹنے کی خبریں، فوٹو یا ویڈیوز تو اکثر لوگوں نے دیکھ رکھی ہیں اور اْس سے حسبِ ضرورت لوگ عبرت بھی حاصل کرتے ہیں اور لذت بھی۔ مگر اْلٹی ہوئی بس ہو یا ٹرین ، اس سے تو لوگوں نے ہمیشہ عبرت ہی حاصل کی ہے ۔
بسوں اور گاڑیوں کے بعد زیادہ تر حادثات ٹرینوں کے ہوتے ہیں۔ اس ضمن میں ایک لطیفہ یاد آگیا۔ ایک مرتبہ ریل گاڑی کا کانٹا بدلنے والی کسی پوسٹ کے لیے انٹرویو ہو رہے تھے۔ انٹرویو لینے والے نے پہلے سے سوچ رکھا تھا کہ اْس نے کسے چننا ہے اور وہ حاضر امیدواروں میں موجود بھی نہیں تھا ۔ اْس نے ایک امیدوار سے پوچھا کہ اگر اْسے معلوم ہو جائے کہ دو گاڑیاں ایک ہی ٹریک پر آمنے سامنے سے آرہی ہیں تو تم کیا کرو گے؟
اْس نے جواب دیا کہ میں اسٹیشن ماسٹر سے کہوں گا کہ وہ اِس کا کوئی بندوبست کرے ۔
انٹرویو لینے والے نے کہا کہ اگر وہ موجود نہ ہو تو؟
امیدوار نے کہا پھر میں اسسٹنٹ اسٹیشن ماسٹر سے کہوں گا۔
اور اگر وہ بھی نہ ملے تو پھر ۔۔
پھر میں سگنل مین سے کہوں گا کہ وہ دونوں گاڑیوں کو دور دور رْک جانے کا سگنل دے۔
اور اگر وہ بھی نہ ملے تو پھر؟
امیدوار نے کہا میں اپنی دادی کو بلا لاؤں گا۔
تمہاری دادی وہاں کیا کرے گی؟ انٹرویو لینے والے نے حیرت سے پوچھا
اْنہیں ٹرینوں کی ٹکر خصوصاً ہیڈ کولیڑن دیکھنے کا بڑا شوق ہے ، وہ اپنا شوق پورا کر لیں گی ۔ امیدوار نے جواب دیا۔
ٹرینوں کا ہیڈ کولیڑن یا ٹیل کولیڑن پاکستان میں ہوتا ہی رہتا ہے ۔ اس طرح کے حادثات پہلے تو جنوری کے مہینے میں جب کہ دھند کا راج ہوتا ہے ، ہوا کرتے تھے مگر اب جنوری تا دسمبر کسی بھی مہینے کی کسی بھی تاریخ کو رونما ہو جاتے ہیں ۔ اِن حادثات کی وجوہات اور تفصیلات بیان کرنا چونکہ اِس وقت ہمارا موضوع نہیں ہے اِس لیے آگے بڑھتے ہوئے یہ بتاتے ہیں کہ ہیڈ کولیڑن یا آمنے سامنے سے ٹکر کاروں، بسوں اور ٹرینوں کے علاوہ جہازوں کی بھی ہو جاتی ہے۔
چند سال پہلے تک صورتحال یہ تھی کہ ہوائی جہازکے حادثات عموماً دورانِ لینڈنگ یا ٹیک آف رن وے پر ہی رونما ہوتے تھے، پھر پرندوں کے ٹکرانے کی وجہ سے حادثات کی خبریں آنے لگیں ۔ پھر 9/11 کو جب امریکہ کے ٹوین ٹاورز سے دو جہاز ٹکرائے تو بعد میں اونچی عمارتوں سے جہاز ٹکرانے کی خبریں بھی ملتی رہیں۔ مگر گزشتہ چند سالوں سے" کند ہم جنس باہم پرواز کبوتر با کبوتر باز با باز" کے مصداق دو ایک جیسے طیارے آپس میں ٹکرانے کی خبریں بھی آنا شروع ہو گئی ہیں یعنی مسافر اور کمرشل طیاروں کی ٹکریں رن وے کے علاوہ کھلی فضا میں بھی ہوتی ہیں ۔
ہوائی جہاز کا سفر بے شک سب سے تیز سفر ہوتا ہے یعنی ٹرین یا بس کے ذریعے دنوں کا سفر محض چند گھنٹوں میں ہو جاتا ہے ۔ یوں تو فضائی سفر کی کمپنیاں دعوی کرتی ہیں کہ ہوائی سفر ہی سب سے زیادہ محفوظ سفر ہے اور اس کے لیے وہ مختلف تجربات بھی کرتی رہتی ہیں اور نئی نئی ٹیکنالوجیز بھی استعمال کرتی رہتی ہیں مگر پھر بھی حادثات جو ہونا ہوتے ہیں وہ ہو ہی جاتے ہیں۔ گزشتہ دنوں امریکہ میں اوپر تلے کئی ہوائی حادثات رونما ہوئے تو لوگوں نے اِس کی ذمہ داری بھی نو منتخب صدر ٹرمپ پر ڈال دی مگر پھر دوسرے ممالک میں بھی ہوائی جہازوں کے حادثات ہوئے تو خاموشی چھا گئی کہ یہ تو ہوتے ہی رہتے ہیں ۔
چند سال قبل عید سے ایک دن پہلے پی آئی اے کی لاہور سے کراچی جانے والی پرواز کو کراچی لینڈ کرنے سے پہلے ایسا حادثہ پیش آیا کہ ایک کے سوا مسافروں اور عملے کے تمام افراد جان بحق ہوگئے۔ اِس کے علاوہ جہاز کا ملبہ آس پاس کی عمارتوں کی چھتوں پر گرنے سے الگ نقصان ہوا۔ اس حادثے کے بعد معلوم ہوا کہ قومی ائیر لاین کے بہت سے پائلٹس کی تربیت معیار کے مطابق نہیں ہے تو وزیراعظم نے اس کا سنجیدگی سے نوٹس لیتے ہوئے ایسے پائلٹس کو گراؤنڈ کر دیا جس سے قومی ائیر لائن کی مقبولیت کا گراف خاصا گر گیا ، بہت سے ممالک نے تو قومی ائیر لائن کا داخلہ ہی بند کر دیا تھا۔ اْس وقت کی اپوزیشن نے اعتراض کیا کہ وزیراعظم کے اس اقدام سے پاکستان کی معیشت کو بہت نقصان پہنچا ہے۔
فضائی حادثات کی فہرست بنائی جائے تو بہت طویل بن سکتی ہے۔ ماہرین کا خیال ہے کہ سڑکوں پر ہونے والے حادثات کی وجوہات میں تو مماثلت ہو سکتی ہے مگر فضائی حادثات کی صورت میں ہمیشہ نئی صورت حال ہوتی ہے۔ گزشتہ دنوں کینیڈا ٹورنٹوکے پیرسون ائیر پورٹ پر ڈیلٹا ائیر کاطیارہ شدید سردی کے موسم میں لینڈ کرنے کے بعد اِس طرح اْلٹ گیا کہ اِس سے پہلے کسی طیارے کو اِس حالت میں نہیں دیکھا گیا تھا۔ اِس حادثے میں کوئی جانی نقصان تو نہیں ہوا مگر طیارہ ناصرف ناکارہ ہو گیا بلکہ کئی دنوں تک اْس کا ملبہ ائیر پورٹ پر ایسے پڑا رہا کہ حادثہ کینیڈا جیسے ترقی یافتہ ملک میں نہیں ہوا بلکہ کسی انتہائی پسماندہ ملک میں ہوا ہے۔ جہاز ساز کمپنیاں ایسے حادثات کی وجوہات کو عوام سے چھپانے میں عموماً کامیاب ہو ہی جاتی ہیں ، ممکن ہے اِس مرتبہ بھی اْنہیں کامیابی ہو جائے ۔
سندھ حکومت کا بڑا قدم ، خواجہ سراؤں کے لیے کھیلوں کے انعقاد کا فیصلہ