کراچی؛ سحری کے وقت موٹرسائیکل سواروں کی فائرنگ، گلی کا سیکورٹی گارڈ جاں بحق
اشاعت کی تاریخ: 6th, March 2025 GMT
کراچی کے علاقے پی ای سی ایچ ایس سوسائٹی میں موٹرسائیکل سواروں کی فائرنگ سے گلی کا سیکورٹی گارڈ جاں بحق ہوگیا۔
ترجمان کراچی پولیس کے مطابق فیروز آباد کے علاقے پی ای سی ایچ ایس بلاک 2 گلی نمبر 4 میں موٹر سائیکل سوار ملزمان کی فائرنگ سے ایک شخص جاں بحق ہو گیا۔ مقتول کی لاش جناح اسپتال منتقل کی گئی۔ مقتول کی شناخت 38 سالہ مرزا ساجد بیگ ولد ریاض بیگ کے نام سے کی گئی۔
مقتول لائنز ایریا کا رہائشی اور نجی سیکیورٹی کمپنی کا گارڈ تھا۔ واقعے کے وقت مقتول مزکورہ علاقے کی گلی میں بطور سیکیورٹی ڈیوٹی انجام دے رہا تھا کہ نامعلوم موٹرسائیکل سوار ملزمان آئے اور فائرنگ کر کے فرار ہوگئے۔ علاقہ مکینوں کے مطابق مقتول ساجد ایک بیٹی کا باپ تھا اور گزشتہ ڈیڑھ سال سے گلی میں سیکیورٹی کے فرائض انجام دے رہا تھا۔ ، مکینوں نے بتایا کہ واقعہ سحری کے ٹائم پیش آیا۔ محلے والے سحری میں مصروف تھے فائرنگ کی آواز سنائی دی فوری طور پر گلی میں نکل کر دیکھا تو ساجد کی خون میں لت پت لاش پڑی ہوئی تھی۔
انہوں نے بتایا کہ علاقے کی گاڑیوں سے آئے دن بیٹریاں چوری ہو رہی تھیں جبکہ اسٹریٹ کرائم کی وارداتیں بھی بہت زیادہ بڑھ گئیں تھیں۔ متعدد بار فیروز آباد تھانے والوں کو درخواست دی کہ علاقے میں پولیس کا گشت بلکل نہیں ہے وہ بڑھایا جائے تاہم نامعلوم وجوہات پر پولیس نے گشت نہیں بڑھایا بلکہ کبھی کبھی جو دن کے وقت پولیس موبائل آتی تھی وہ بھی اب چکر نہیں لگاتی تھی۔ ساجد کے سکیورٹی گارڈ رکھنےکے بعد سے وارداتیں تھم گئی تھیں جس پر علاقے والو ں نے سکون کا سانس لیا تھا۔
پولیس کو جائے وقوعہ سے تیس بور پستول کے تین خول ملے ہیں۔ کراٸم سین یونٹ کی ٹیم واقعے کے بعد جائے وقوعہ پر پہنچ گئی تھی اور شواہد اکھٹے کیے۔ پولیس کا کہنا تھا کہ ورثا کو اطلاع کردی گئی۔
دوسری جانب گڈاپ سٹی کے علاقے سپرہائی وے ڈی ایچ اے 9 کے قریب فائرنگ سے ایک شخص زخمی ہوگیا۔ زخمی ہونے والے شخص کو ایدھی ایمبولینس کے ذریعے فاطمہ بقائی اسپتال ٹول پلازہ منتقل کیا گیا۔ ترجمان کراچی پولیس کے مطابق زخمی ہونے والے شخص کی شناخت 69 سالہ زاہد حسین ولد بادل خان کے نام سے کی گئی۔ فائرنگ کا واقعہ ڈکیتی کی واردات کے دوران مزاحمت پر پیش آیا۔ علاقہ پولیس واقعے کی تحقیقات کر رہی ہے ۔
.ذریعہ: Express News
پڑھیں:
پنجاب پولیس کی کچے کے علاقے میں کارروائی، دو مغوی بازیاب
RAHIM YAR KHAN:پنجاب پولیس نے رحیم یار خان میں کچے کے علاقے میں جرائم پیشہ عناصر کے خلاف کارروائی کے دوران دو مغویوں کو بازیاب کروا لیا اور اس دوران دو اغوا کار زخمی ہوگئے۔
ترجمان پنجاب پولیس نے بتایا کہ کارروائی کے دوران کریمنلز سے بازیاب ہونے والے مغویوں کی شناخت محمد علی اور سیف الرحمان حیدر کے نام سے ہوئی ہے اور دونوں کا تعلق اسلام آباد سے بتایا جا رہا ہے۔
انہوں نے کہا کہ رحیم یار خان پولیس کا کچہ ماچھکہ میں دوران پیٹرولنگ ڈاکوؤں سے مقابلہ ہوا اور دوران غیر مصدقہ طور پر دو ڈاکوؤں کے زخمی ہونے کی بھی اطلاعات ہیں تاہم اغوا کار دونوں مغویوں کو چھوڑ کر کچے کے علاقے میں فرار ہوگئے جبکہ پولیس کا سرچ آپریشن جاری ہے۔
ڈی پی او رحیم یار خان رضوان عمر گوندل کا کہنا تھا کہ بازیاب مغویوں کے بارے متعلقہ پولیس سے رابطہ کیا جا رہا ہے۔
ترجمان پنجاب پولیس نے بتایا کہ کاروائی میں بکتر بند گاڑیوں، ایلیٹ کمانڈوز سمیت پولیس کی بھاری نفری نے حصہ لیا، آئی جی پنجاب ڈاکٹر عثمان انور نے کامیاب کارروائی پر ڈی پی او رضوان عمر گوندل اور پولیس ٹیم کو شاباش دی ہے۔
کراچی: 9 مئی کیس، تحریکِ انصاف کے ملزمان کارکنوں پر فردِ جرم عائد نہ ہو سکی