پاکستان کا جنوبی وزیرستان میں 30 عسکریت پسندوں کو ہلاک کرنے کا دعویٰ
اشاعت کی تاریخ: 19th, February 2025 GMT
ویب ڈیسک —
پاکستانی فوج کے شعبہ تعلقات عامہ(آئی ایس پی آر) کی جانب سے جاری کیے جانے والے ایک بیان میں کہا گیا ہےکہ سیکیورٹی فورسز نے افغانستان سے ملحق ایک ضلع میں کارروائی کے دوران” کم از کم 30 شر پسند وں” کو ہلاک کر دیا ہے۔”
منگل کے روز جاری فوجی بیان میں کہا گیا کہ یہ ہلاکتیں جنوبی وزیرستان کے علاقے سروراکا میں عسکریت پسندوں کے ایک ٹھکانے پر رات بھر کے دوران کی جانے والی ایک کارروائی میں ہوئیں۔ یہ آپریشن انٹیلیجینس کی اطلاعات کی بنیاد پر کیا گیا تھا۔
ہلاک ہونے والے افراد کو ’’خوارج ‘‘ قرار دیا گیا ، جو حکومت کی جانب سے کالعدم تحریک طالبان پاکستان یا عسکریت پسند گروپ ٹی ٹی پی کے ارکان کے لیے استعمال کی جانے والی ایک مقامی اصطلاح ہے ۔
ٹی ٹی پی نے ان جھڑپوں پر کوئی تبصرہ نہیں کیا ہے، اور تشدد سے متاثرہ ضلع میں آزاد ذرائع سے حکومتی دعوؤں کی تصدیق کرنا ممکن نہیں ہے۔
وزیرستان کے علاقے اور افغان سرحد کے ساتھ واقع قریبی اضلاع میں پاکستانی فوجیوں، پولیس افسروں اور مختلف سرکاری اداروں کو تقریباً روزانہ عسکریت پسندوں کی جانب سے ہدف بنا کرکیے گئے حملوں کا سامنا ہوتا ہے ، جن میں سے بیشتر کی ذمہ داری ٹی ٹی پی قبول کرتی ہے۔
تشدد کے ان واقعات میں 2025 کے صرف پہلے دو ماہ میں درجنوں پاکستانی سکیورٹی اہلکار ہلاک ہو چکے ہیں۔ فوجی حکام کا دعویٰ ہے کہ جوابی کارروائیوں میں حالیہ دنوں میں اہم عسکریت پسند کمانڈروں سمیت ٹی ٹی پی کے متعدد کارندوں کو ہلاک کیا گیا ہے۔
اسلام آباد کا الزام ہے کہ ٹی ٹی پی، جسے اقوام متحدہ کی جانب سے عالمی دہشت گرد تنظیم کے طور پر درج کیا گیا ہے، سرحد پار سے دہشت گرد حملوں کے لیے افغانستان میں محفوظ ٹھکانوں اور تربیتی کیمپوں کا استعمال کرتی ہے۔
کابل میں طالبان حکومت جسے کسی بھی ملک نے تسلیم نہیں کیا ہے ، پاکستان کے الزامات کو مسترد کرتی ہے۔
گزشتہ ہفتے اقوام متحدہ کی تجزیاتی معاونت اور پابندیوں کی نگرانی کرنے والی ٹیم کی جاری کردہ تازہ ترین رپورٹ میں پاکستان کے خدشات کو اجاگر کرتے ہوئے کہا گیا ہے کہ ٹی ٹی پی نے ملک کے اندر اور افغان سرزمین سے اپنے حملوں میں "نمایاں اضافہ” کر دیا ہے ۔
رپورٹ میں بتایا گیا کہ کابل "ٹی ٹی پی کو لاجسٹک اور کارروائیوں کے لیے جگہ اور مالی مدد فراہم کرتا رہا ہے۔” رپورٹ میں مزید کہا گیا کہ عسکریت پسند گروپ نے افغانستان کے صوبوں کنڑ، ننگرہار، خوست اور پکتیکا میں نئے تربیتی مراکز قائم کیے ہیں، جبکہ ٹی ٹی پی کے عملے کی بھرتیوں میں اضافہ کیا ہے جن میں افغان طالبان بھی شامل ہیں۔
طالبان حکومت نے اقوام متحدہ کے نتائج کو "غلط” اور حقیقت کے برعکس قرار دیتے ہوئے مسترد کر دیا ہے۔
.ذریعہ: Al Qamar Online
کلیدی لفظ: عسکریت پسند کی جانب سے ٹی ٹی پی کہا گیا گیا ہے
پڑھیں:
تحریک طالبان پاکستان کا بیانیہ اسلامی تعلیمات، قانون، اخلاقیات سے متصادم قرار
ماہرین نے خبردار کیا کہ کالعدم ٹی ٹی پی کا بیانیہ انتہا پسندی کا پردہ ہے جو پاکستان کی اسلامی اور جمہوری اساس کو کمزور کرنے کی کوشش ہے، ان کا کہنا ہے کہ یہ گروہ نہ صرف اسلامی تعلیمات کیخلاف ہے بلکہ قانونی اور اخلاقی اصولوں کو بھی پامال کر رہا ہے۔ اسلام ٹائمز۔ کالعدم تحریک طالبان پاکستان (ٹی ٹی پی) نے دعویٰ کیا ہے کہ پاکستان میں موجودہ نظام حکومت غیراسلامی ہے اور وہ تشدد کے ذریعے شریعت کا نفاذ کرکے معاشرے کو حقیقی اسلامی اصولوں پر استوار کریں گے۔ ماہرین کے مطابق کالعدم ٹی ٹی پی کا آئین اور جمہوریت کو مسترد کرتے ہوئے تشدد کو ’’جہاد‘‘ قرار دینا اسلامی تعلیمات کی غلط تشریح ہے، اسلامی تعلیمات بے جا بغاوت کو ’’فساد فی الارض‘‘ قرار دیتی ہیں، نبی کریم ﷺ نے فرمایا جس نے اپنے حاکم سے نافرمانی کی وہ مجھ سے جدا ہوا‘ (بخاری)۔ فقہا کے مطابق بغاوت تب تک جائز نہیں جب تک حکمران کھلم کھلا کفر نہ کرے جبکہ پاکستان کا آئین اسلامی اصولوں پر مبنی ہے، شریعت کا نفاذ جبر کے بجائے حکمت، عدل اور اجتماعی رضامندی سے ہونا چاہئے۔
قانونی طور پر پاکستان کا آئین اسلام کو ریاستی مذہب قرار دیتا ہے اور شریعت کا نفاذ پارلیمنٹ کے ذریعے طے ہوتا ہے، ٹی ٹی پی کا غیر آئینی تشدد قانوناً غداری کے مترادف ہے۔ اخلاقی طور پر کالعدم ٹی ٹی پی کا تشدد، خود ساختہ تعزیرات اور عوامی امن کی تباہی شریعت کے مقاصد یعنی عدل، رحمت اور انسانی حقوق کے منافی ہے، قرآن کا فرمان ہے: ’’دین میں کوئی زبردستی نہیں‘‘ (البقرہ:256) اور جبراً شریعت مسلط کرنا اسلام کے رحمت للعالمینﷺ کے تصور کو مجروح کرتا ہے۔ ماہرین نے خبردار کیا کہ کالعدم ٹی ٹی پی کا بیانیہ انتہا پسندی کا پردہ ہے جو پاکستان کی اسلامی اور جمہوری اساس کو کمزور کرنے کی کوشش ہے، ان کا کہنا ہے کہ یہ گروہ نہ صرف اسلامی تعلیمات کیخلاف ہے بلکہ قانونی اور اخلاقی اصولوں کو بھی پامال کر رہا ہے۔
حافظ آباد میں مضر صحت مٹھائی کھانے سے 3 بچے انتقال کرگئے