سارک کا احیا، جنوبی ایشیاء میں امن اور ترقی کی کنجی
اشاعت کی تاریخ: 13th, February 2025 GMT
پاکستان اوربنگلہ دیش کے درمیان فوجی تعاون میں حالیہ برسوں میں پیشرفت سے نہ صرف جنوبی ایشیاء میں طاقت کاتوازن بدل کر متاثرکرسکتاہے بلکہ انڈیاکے لئے بھی یہ ایک اہم تشویش کاباعث بن گیا ہے۔ تاریخی،سیاسی،اورجغرافیائی حقائق کی بنیاد پر 54سال کے بعداس خطے میں پاک بنگلہ دیش کے بڑھتے ہوئے تعاون سے آخروہ کون سے عوامل اور وجوہات ہیں جس نے انڈیاکوتشویش میں مبتلاکردیاہے اورانڈین میڈیا شب وروزواویلا کررہاہے۔انڈین نیوزویب سائٹ ’’فرسٹ پوسٹ‘‘پرچھپنے والی ایک خبرکی سرخی ’’انڈیا کے لئے باعثِ تشویش،1971ء کے بعدپاکستانی فوج کی پہلی مرتبہ بنگلہ دیش واپسی‘‘اورایسی دیگرمتعدد خبریں اور تجزئیے انڈین میڈیاپر گزشتہ کئی دن سے چھاپے اور نشر کئے جارہے ہیں۔
انڈین وزارت داخلہ کے ترجمان نے کہاہے پریس اورسوشل میڈیاپر گردش کرتی خبریں غلط ہیں کہ آئی ایس آئی کے سربراہ بنگلہ دیش کے دورے پر آئے تھے۔انڈین میڈیامیں ایسی ’’تشویش‘‘ بھری خبروں نے اس وقت زورپکڑاجب رواں مہینے بنگلہ دیشی فوج کا ایک وفدپرنسپل سٹاف آفیسر لیفٹیننٹ جنرل ایس ایم قمرالحسن کی قیادت میں پاکستان پہنچا اور ان کی پاکستان میں عسکری قیادت سے ملاقاتیں ہوئیں۔اس دورے کے دوران بنگلہ دیشی فوج کے وفدنے پاکستانی فوج کے سربراہ جنرل عاصم منیر، چیئرمین جوائنٹ چیفس آف سٹاف کمیٹی جنرل ساحر شمشادمرزااورپاکستانی فضائیہ کے سربراہ ایئرمارشل ظہیراحمدبابرسندھوسے بھی ملاقات کی تھیں۔
پاکستان اوربنگلہ دیش کے بیچ فوجی تعاون سے متعلق سوال پرانڈین وزارت خارجہ کے ترجمان رندھیر جیسوال نے کہاکہ ’’جوبھی سرگرمیاں ہمارے پڑوس میں،خطے میں یاانڈیاکے اردگردہوتی ہیں، ہم ہمیشہ اس پرنظررکھتے ہیں اور(خاص کر)ایسی سرگرمیاں جس کاتعلق ہماری قومی سلامتی سے ہو۔ ہمیں جس طرح کے قدم اٹھانے ہیں،وہ ہم اٹھائیں گے‘‘۔ــ
تاریخی طور پرپاکستان اوربنگلہ دیش کے درمیان تعلقات تنائوکاشکاررہے ہیں اوراس کی بنیادی وجہ 1971ء میں پاکستان کودولخت کرنے میں انڈیا کاوہ مذموم کردارہے جس کو مودی خودمیڈیا پرکئی بارتسلیم کر چکا ہے۔ پاکستان اوربنگلہ دیش کی تاریخ1947ء کی تقسیم ہند سے جڑی ہوئی ہے۔ مشرقی پاکستان(موجودہ بنگلہ دیش) اورمغربی پاکستان(موجودہ پاکستان)کے درمیان سیاسی، معاشی،اور ثقافتی اختلافات نے1971ء میں بنگلہ دیش کے قیام کی راہ ہموارکی۔اس وقت انڈیانے بنگلہ دیش کی حمایت میں اہم کرداراداکیا،اورانڈیا کی فوجی مداخلت نے پاکستان کودولخت کرنے اوربنگلہ دیش کوایک آزادملک بنانے میں کلیدی کرداراداکیالیکن یہ بھی سچ ہے کہ آج ایسے اختلافات توامریکاکی ریاستوں کے مابین بھی ہیں اورخودانڈیاکے اندرکئی ریاستوں میں اس قدربدترین حالات ہیں کہ اس وقت 32علیحدگی کی تحریکیں چل رہی ہیں اور کئی ریاستوں میں نیم خودمختاری کا سماں ہے اورخود انڈیا کواپنی ٹرینوں کو ان ریاستوں سے گزرنے کے لئے ان تنظیموں کو باقاعدہ ٹیکس ادا کرنا پڑتاہے لیکن پاکستان یا چین نے کبھی وہ مکروہ کردار ادا کرنے کی کوشش نہیں کی جیساانڈیانے بنگلہ دیش میں اداکیا۔
1971ء کے بعد،انڈیانے بنگلہ دیش پر اپنے سیاسی اوراقتصادی اثرورسوخ کوبڑھانے کی کوشش کی لیکن حالیہ برسوں میں بنگلہ دیش نے انڈیاکے اثرسے باہرنکلنے اوراپنی خودمختار پالیسی بنانے کی کوششیں کی ہیں۔ 1990ء کی دہائی کے بعد سے ، پاکستان اور بنگلہ دیش کے تعلقات میں بتدریج بہتری آناشروع ہوئی،خاص طورپر اقتصادی تعاون اورعوامی رابطوں کے ذریعے۔ تاہم،فوجی تعلقات میں نمایاں پیشرفت حالیہ برسوں میں دیکھنے کوملی ہے،جوانڈیا کے لئے باعثِ تشویش ہے۔
گزشتہ برس اگست میں پرتشدد مظاہروں کے نتیجے میں شیخ حسینہ کوبطوروزیرِاعظم استعفیٰ دے کر انڈیا جانا پڑاتھاجس کے بعد بنگلہ دیش میں ڈاکٹر محمدیونس کی سربراہی میں عبوری حکومت کی گئی تھی ۔ شیخ حسینہ کوانڈیاکاحامی اور پاکستان کامخالف تصور کیاجاتاتھا اور صرف یہی نہیں بلکہ حسینہ واجد نے جماعت اسلامی بنگلہ دیش کے درجنوں رہنمائوں کوعدالتی ملی بھگت سے پھانسی پرلٹکادیاجن کا صرف یہ جرم تھاکہ انہوں نے1971ء میں بطور پاکستانی شہری ہونے کے ناطے انڈین فوجیوں کے خلاف اپنی ملکی فوج کاساتھ دیااورجماعت اسلامی کے ہزاروں اراکین کوپابندِ سلاسل کردیااوراپنے تمام مخالفین کوٹھکانے لگا کر بدترین فسطائیت کے ساتھ اپنی حکومت کوچلایا۔ بنگلہ دیش کی فوج کے اندربھی اپنے جابرانہ احکام کے تحت بھارت کی مددسے کئی بنگلہ دیش افسران کوہلاک کرکے ایک ایسے ڈکٹیٹر کا روپ اختیارکرلیاکہ بنگلہ دیشی عوام میں سے کسی کو ان کی حکومت کے خلاف کچھ کہنے اور لکھنے تک کی اجازت نہ ہو۔ان کے دورِحکومت میں بنگلہ دیش اورپاکستان کے درمیان تعلقات زیادہ خوشگوارنہیں رہے تھے تاہم شیخ حسینہ کی اقتدارسے بے دخلی کے بعددونوں ممالک کے تعلقات میں بہتری آتی ہوئی نظرآئی۔
گزشتہ مہینے قاہرہ میں ڈی8سمٹ کے دوران پاکستانی وزیرِاعظم شہبازشریف کی بنگلہ دیش کے چیف ایڈوائزرڈاکٹرمحمدیونس سے ملاقات بھی ہوئی تھی اور پاکستانی وزیراعظم کے دفترکے مطابق دونوں رہنمائوں نے ’’دوطرفہ تعلقات میں حالیہ مثبت پیشرفت پر اطمینان کا اظہار‘‘کیاتھااور ’’باہمی فوائدپرمبنی ترقیاتی مقاصد‘‘ حاصل کرنے کے لئے مشترکہ کوششیں کرنے پراتفاق بھی کیاتھا۔ اس ملاقات کے تناظرمیں پہلی مرتبہ اعلیٰ سطحی فوجی وفدنے پاکستان کودورہ کیاجہاں پاکستان اوربنگلہ دیش کے درمیان دفاعی معاہدے کے تحت دونوں ممالک تربیتی مشقوں، انٹیلی جنس شیئرنگ،اوردفاعی سازوسامان کے تبادلے میں تعاون کررہے ہیں۔
اس معاہدے کے تحت پاکستانی فوج بنگلہ دیش کے افسران کوتربیت فراہم کررہی ہے،جودونوں ممالک کے درمیان دفاعی تعلقات کو مضبوط بنارہی ہے۔ مزیدبرآں دونوں ممالک مشترکہ فوجی مشقیں کرچکے ہیں اورمزیدایسے پروگرام منصوبہ بندی کے مراحل میںہیں جن کامقصدخطے میں دفاعی صلاحیتوں کوبڑھاناہے۔ پاکستان بنگلہ دیش کو ہتھیاروں کی فراہمی پربھی غورکررہا ہے، جس میں جدیدٹیکنالوجی کے ہتھیارشامل ہیں۔ برسوں بعد پاک بنگلہ دیش تعاون پرمودی سرکاربے بنیاد پروپیگنڈہ سے اپنی تشویش کااظہارکر رہی ہے جس کا مودی پریس شب وروزواویلاکررہاہے۔مودی سرکار مشرق اورمغرب دونوں اطراف میں پاکستان اوربنگلہ دیش کے تعلقات مضبوط ہونے سے خودکو ایک تزویراتی گھیرائو میں محسوس کررہی ہے۔
دوسرااہم پہلویہ ہے کہ پاک بنگلہ دیش فوجی تعاون خطے میں انڈیاکے اثرورسوخ کوکم کرنے کا باعث بن سکتاہے اورانڈیا(اسرائیل، امریکا) کی مددسے علاقے میں اپنی برتری اور خطے کا تھانیدار بننے کاجو خواب دیکھ رہاہے،وہ چکناچور ہوجائے گا۔
تیسرااہم پہلویہ ہے کہ چین،جوانڈیاکااہم جغرافیائی حریف ہے،پاکستان اوربنگلہ دیش کے درمیان تعلقات میں ایک پسِ پردہ قوت کے طورپردیکھا جاتا ہے۔ چین پہلے ہی دونوں ممالک کوفوجی سازوسامان فراہم کررہاہے جس سے انڈیا کو خطرہ محسوس ہوتاہے۔
چوتھااہم پہلویہ ہے کہ پاکستان اوربنگلہ دیش کے درمیان فوجی تعاون انڈیاکی جنوبی ایشیا ء میں بالادستی کو چیلنج کرسکتاہے اورانڈیاکیلئے سب سے بڑا خدشہ یہ ہے کہ یہ اتحادجنوبی ایشیامیں اس کی معاشی اور اسٹریٹجک برتری کوناقابل تلافی نقصان پہنچاسکتا ہے۔
پانچواں پہلویہ ہے کہ انڈیااوربنگلہ دیش کے درمیان سرحدی تنازعات کے ساتھ ساتھ دریائی پانی کی تقسیم پربھی شدیداختلافات ہیں جودونوں ممالک کے تعلقات میں کشیدگی کاسبب ہیں۔
چھٹااہم پہلووہ بھارتی خوف ہے کہ پاک بنگلہ دیش کے درمیان انٹیلی جنس شیئرنگ انڈیاکے لئے سلامتی کے خطرات پیداکرسکتی ہے خاص طورپران علاقوں میں جہاں علیحدگی پسند تحریکیں فعال ہیں۔ کیونکہ انڈیابنگلہ دیش کے قیام میں اہم کرداراداکر چکاہے اوراس خطے میں اپنی بالادستی برقراررکھنے کے لئے ہمیشہ محتاط رہاہے۔بنگلہ دیش کا پاکستان کے قریب جانا انڈیاکے لئے ایک جذباتی اور اسٹریٹجک دھچکاہے۔ (جاری ہے)
ذریعہ: Daily Ausaf
کلیدی لفظ: پاکستان اوربنگلہ دیش کے درمیان بنگلہ دیش کے درمیان پاک بنگلہ دیش دونوں ممالک پاکستان اور فوجی تعاون تعلقات میں کے تعلقات ہیں اور میں پاک کے بعد کے لئے
پڑھیں:
برکس رکن ممالک کے درمیان تعاون کو مضبوط بنانے کے لیے ایک نیا رابطہ ماڈل پیش کر سکتا ہے، ایران
ایتھوپیا کی مجلسِ نمائندگان کے صدر تاگسے چافو سے ملاقات کے دوران صدر مسعود پزشکیان نے کہا کہ ایران کی جانب سے دوطرفہ تعلقات کو وسعت دینے اور گہرا کرنے میں گہری دلچسپی پر زور دیا۔ اسلام ٹائمز۔ ایران کے صدر مسعود پزشکیان نے ایران اور ایتھوپیا کی برکس میں مشترکہ رکنیت کا حوالہ دیتے ہوئے کہا ہے کہ برکس باہمی قومی خودمختاری، علاقائی سالمیت، اور ممالک کی متنوع ثقافتوں و تہذیبوں کے احترام پر مبنی ایک نیا رابطہ ماڈل پیش کر سکتا ہے۔ ایسنا کے مطابق مسعود پزشکیان نے ایتھوپیا کی مجلسِ نمائندگان کے صدر تاگسے چافو سے ملاقات کے دوران، ایران کی جانب سے دوطرفہ تعلقات کو وسعت دینے اور گہرا کرنے میں گہری دلچسپی پر زور دیا۔ انہوں نے کہا کہ اسلامی جمہوریہ ایران اقتصادی، سفارتی، ثقافتی اور سلامتی سمیت تمام ممکنہ شعبوں میں ایتھوپیا کے ساتھ اپنے تعلقات کو فروغ دینے کے لیے آمادہ ہے۔
ایرانی صدر نے کہا کہ اس ہدف کے حصول کے لیے مشترکہ تعاون کمیشن کو فعال بنانا، مشترکہ نکات کی درست نشاندہی، تکمیلی صلاحیتوں کا تعین اور باہمی مفادات کی بنیاد پر مکالمے، معاہدے اور مفاہمت کے راستے پر گامزن ہونا ضروری ہے۔ ان کے مطابق موجودہ ادارہ جاتی طریقۂ کار سے مؤثر انداز میں فائدہ اٹھانا دونوں ممالک کے درمیان تعاون کے عمل کو تیز کر سکتا ہے۔ صدر پزشکیان نے ایران اور ایتھوپیا کی برکس میں مشترکہ رکنیت کی طرف اشارہ کرتے ہوئے اس کثیرالجہتی فریم ورک کو باہمی تعاملات کے فروغ، اقتصادی و سیاسی روابط کے استحکام اور عالمی نظام میں بڑھتے ہوئے یکطرفہ رویّوں کا مقابلہ کرنے کے لیے ایک قیمتی اور اسٹریٹجک پلیٹ فارم قرار دیا۔
انہوں نے کہا کہ برکس قومی خودمختاری، علاقائی سالمیت اور مختلف تہذیبوں کے احترام پر مبنی ایک نیا رابطہ ماڈل پیش کر سکتا ہے اور عالمی سطح پر منصفانہ اور متوازن تعاون کی راہ ہموار کر سکتا ہے۔ انہوں نے مزید کہا کہ اسلامی جمہوریہ ایران ایک ذمہ دارانہ رویّے کے ساتھ اور خطے کے تمام ممالک کی شراکت سے پائیدار امن اور سلامتی کے قیام و استحکام میں فعال کردار ادا کرنے کے لیے تیار ہے۔ صدرِ ایران نے اس بات پر زور دیا کہ اسلامی جمہوریہ ایران کا وژن ایک ایسا عالمی نظام ہے جو امن و سلامتی سے بھرپور ہو اور جنگ، تشدد اور تصادم سے پاک ہو۔
ان کے مطابق ہمارا یقین ہے کہ باخبر اور گہری انسانی سمجھ بوجھ رکھنے والے افراد کبھی جنگ کے خواہاں نہیں ہوتے اور نہ ہوں گے، بلکہ وہ تصادم کے بجائے مکالمے اور تعاون کے راستے کو ترجیح دیتے ہیں۔ اس ملاقات میں ایتھوپیا کی مجلسِ نمائندگان کے صدر تاگسے چافو نے بھی صدرِ ایران سے ملاقات پر مسرت کا اظہار کیا اور ایران کے ساتھ بالخصوص سفارتی، اقتصادی اور سلامتی کے شعبوں میں تعلقات کو فروغ دینے میں اپنے ملک کی دلچسپی پر زور دیا۔ انہوں نے کہا کہ دونوں ممالک کی پارلیمانیں اپنی تمام قانونی اور نگرانی کی صلاحیتوں کو بروئے کار لاتے ہوئے وزارتِ خارجہ کی حمایت کریں گی اور سفارتی تعاون میں اضافے اور دوطرفہ تعلقات کو مزید مضبوط بنانے کی راہ ہموار کریں گی۔
ایتھوپیا کے پارلیمانی اسپیکر نے اقتصادی و تجارتی تعاون کی اہمیت کی طرف اشارہ کرتے ہوئے کہا کہ ایتھوپیا ایران کے ساتھ اقتصادی تبادلے بڑھانے، مشترکہ سرمایہ کاری کو فروغ دینے اور برکس کے فریم ورک، خصوصاً اس تنظیم کے نئے ترقیاتی بینک کی صلاحیتوں سے مؤثر فائدہ اٹھانے کے لیے پرعزم ہے، تاکہ اقتصادی و مالی تعاون کی بنیادوں کو مضبوط کیا جا سکے۔
تاگسے چافو نے ایران اور ایتھوپیا کے عوام کے درمیان وسیع ثقافتی اور تہذیبی اشتراکات کا ذکر کرتے ہوئے مغربی ایشیا میں امن و سلامتی کے قیام اور استحکام میں اسلامی جمہوریہ ایران کے کردار کو نہایت اہم قرار دیا۔
پی ٹی آئی ورکرز کے حقوق پر ایک اور ڈاکا منظور نہیں: اکبر ایس بابر