کراچی: ڈمپر نے ایک اور نوجوان کی جان لے لی، شہر میں 4 ہیوی گاڑیاں نذر آتش
اشاعت کی تاریخ: 11th, February 2025 GMT
کراچی:
ہاکس بے مشرف کالونی کے قریب تیز رفتار ڈمپر کی ٹکر سے موٹر سائیکل سوار جاں بحق ہوگیا۔ شہر میں نامعلوم افراد نے مزید دو ہیوی گاڑیوں کو آگ لگا دی جس کے بعد صبح سے اب تک جلائی جانے والی مال بردار گاڑیوں کی تعداد 4 ہوگئی۔
تفصیلات کے مطابق منگل کی صبح موچکو تھانے کے علاقے ہاکس بے روڈ مشرف کالونی، ابراہیم گوٹھ، شیراز کوچ کے آخری اسٹاپ کے قریب تیز رفتار ڈمپر ٹی کے یو 621 نے موٹر سائیکل کو ٹکر مار دی جس کے نتیجے میں موٹر سائیکل سوار شخص موقع پر جاں بحق ہوگیا۔ متوفی کی شناخت 30 سالہ صدیق احمد ولد محمد یعقوب کے نام سے ہوئی ہے، جو کنسٹرکشن کا کام کرتا تھا اور مشرف کالونی لسبیلہ چوک کا رہائشی تھا۔ اس کا آبا ئی تعلق آزاد کشمیر سے تھا۔
موچکو تھانے کے قائم مقام ایس ایچ او راجہ خرم نے بتایا کہ حادثے کے بعد ڈمپر کا ڈرائیور موقع سے فرار ہوگیا، تاہم پولیس نے ڈمپر کو تحویل میں لے کر تھانے منتقل کردیا ہے۔ حادثے کا مقدمہ متوفی کے چچا محبوب کی جانب سے ڈمپر کے فرار ہونے والے ڈرائیور کے خلاف درج کیا جارہا ہے۔ پولیس نے قانونی کارروائی کے بعد متوفی کی لاش اس کے ورثا کے حوالے کردی اور ڈمپر کے فرار ہونے والے ڈرائیور کی تلاش شروع کردی ہے۔
دوسری جانب کراچی میں خوفناک ٹریفک حادثات میں شہریوں کے جاں بحق ہونے کے واقعات کے بعد شہر میں نامعلوم افراد کی جانب سے واٹر ٹرینکر، ڈمپر اور مال بردار ٹریلر کو آگ لگانے کے واقعات میں اضافہ ہوگیا ہے۔ منگل کو سرجانی ٹاؤن تھانے کے علاقے سرجانی ٹاؤن عبداللہ موڑ کے قریب تین نامعلوم افراد نے واٹر ٹینکر کو آگ لگا دی اور فرار ہوگئے۔ آگ لگنے کی اطلاع پر فائر بریگیڈ کا عملہ اور پولیس موقع پر پہنچ گئے اور فائر بریگیڈ کے عملے نے واٹر ٹینکر میں لگی آگ پر قابو پا لیا، جس کے بعد واٹر ٹینکر کا اگلا حصہ مکمل طور پر جل چکا تھا۔ سرجانی ٹاؤن پولیس کے مطابق نامعلوم افراد نے واٹر ٹینکر کو روکا، پھر پیٹرول چھڑک کر آگ لگا دی اور فرار ہوگئے۔ پولیس نے آگ لگانے والے افراد کی تلاش شروع کردی ہے۔
لیاقت آباد دس نمبر کے قریب بھی نامعلوم افراد کی جانب سے ایک ٹریلر کو آگ لگادی گئی۔ پولیس کے مطابق ٹریلر خرابی کے باعث مرکزی سڑک پر کھڑا تھا کہ اسی دوران نامعلوم افراد نے اس پر آگ لگانے کی کوشش کی۔ پولیس نے اس واقعے کی تحقیقات شروع کردی ہے۔ صبح سے اب تک جلائی جانے والی گاڑیوں کی تعداد 4 ہوگئی ہے۔
.ذریعہ: Express News
کلیدی لفظ: نامعلوم افراد نے واٹر ٹینکر پولیس نے کے قریب کے بعد
پڑھیں:
کراچی: فائرنگ کے مختلف واقعات میں پولیس اہلکار سمیت 5 افراد زخمی
کراچی کے مختلف علاقوں میں فائرنگ کے واقعات میں پولیس اہلکار سمیت 5 افراد زخمی ہوگئے۔
تفصیلات کے مطابق قائد آباد کے علاقے ریڑھی گوٹھ گلی نمبر 7 میں گھر کے اندر فائرنگ کے واقعے میں ایک شخص زخمی ہوگیا جسے فوری طبی امداد کے لیے جناح اسپتال لیجایا گیا۔
ایس ایچ او قائد آباد رانا خوشی نے بتایا کہ مضروب کی شناخت 45 سالہ ذاکر ولد نیاز اللہ کے نام سے کی گئی جبکہ ابتدائی اطلاعات ک مطابق ذاکر نے اپنے 30 بور پستول کو صاف کرنے کے بعد تین ہوائی فائر کر کے پستول اپنے قریب رکھ لیا تھا کہ اس دوران اس کے 9 سالہ بیٹے نے اسلحہ اٹھایا تو اچانک اس سے گولی چل گئی جو کہ والد کی ٹانگ پر لگی۔
انہوں نے بتایا کہ جائے وقوعہ سے گولی کا ایک خول ملا ہے جسے پولیس نے اپنے قبضے میں لے لیا ہے اور اس حوالے سے مزید چھان بین کی جا رہی ہے۔
ایئر پورٹ ماڈل کالونی آوٹر سنگل کے قریب گارڈ روم میں پولیس اہلکار ٹانگ پر گولی لگنے سے زخمی ہوگیا جسے فوری طبی امداد کے لیے جناح اسپتال لیجایا گیا ۔
ایئر پورٹ پولیس کے مطابق مضروب کی شناخت 24 سالہ کانسٹیبل شیراز کے نام سے کی گئی جو کہ اپنے اسلحے کی صفائی کے دوران اتفاقیہ گولی چلنے سے زخمی ہوا ہے۔
کورنگی کے علاقے 6 نمبر کچی مارکیٹ کے قریب فائرنگ سے ایک شخص زخمی ہوگیا جسے چھیپا کے رضا کاروں نے فوری طبی امداد کے لیے جناح اسپتال پہنچایا جہاں اس کی شناخت 28 سالہ شہباز کے نام سے کی گئی۔ریسکیو حکام کا کہنا ہے کہ واقعہ ڈکیتی کے دوران مزاحمت پر ڈاکوؤں کی فائرنگ سے پیش آیا ہے جبکہ گولی اسے بازو پر لگی تھی۔
میمن گوٹھ کے علاقے لنک روڈ کے قریب فائرنگ سے 25 سالہ بالاج زخمی ہوگیا۔
میمن گوٹھ پولیس کے مطابق واقعہ ذاتی جھگڑے کے دوران کی جانے والی فائرنگ سے پیش آیا ہے جس کی مزید معلومات حاصل کی جا رہی ہے۔
دریں اثنا نیو کراچی فور کے چورنگی اللہ والی کے قریب فائرنگ کے پراسرار واقعہ میں 25 سالہ ریحان زخمی ہوگیا۔
بلال کالونی پولیس کا کہنا ہے کہ واقعہ نامعلوم سمت سے آنے والی گولی لگنے کا بتایا جا رہا ہے جس کی مزید تحقیقات کی جا رہی ہے۔
سندھ حکومت کا بڑا قدم ، خواجہ سراؤں کے لیے کھیلوں کے انعقاد کا فیصلہ