جماعت اسلامی سندھ کے تحت کراچی تا کشمور یومِ یکجہتی کشمیر منایا گیا
اشاعت کی تاریخ: 5th, February 2025 GMT
صوبائی امیر کاشف سعید شیخ نے یوم یکجہتی کشمیر ریلی سے خطاب کرتے ہوئے کہا کہ کشمیر کی آزادی کیلئے مودی سے مذاکرات کی بھیک مانگنے کی بجائے غیرت اور جرآت مند قیادت کی ضرورت ہے۔ اسلام ٹائمز۔ جماعت اسلامی سندھ کے تحت پانچ فروری کو کراچی تا کشمور یومِ یکجہتی کشمیر بھرپور جوش و جذبے کے ساتھ منایا گیا۔ سندھ کے چھوٹے بڑے شہروں دادو، میرپورخاص، حیدرآباد، سکھر، لاڑکانہ، جیکب آباد، نواب شاہ، ٹنڈو محمد خان، بدین، سانگھڑ، مٹیاری، ٹھٹہ، کشمور اور دیگر چھوٹے بڑے شہروں میں ریلیاں، سیمینار، مذاکرے اور جلسہ عام منعقد کئے گئے، اس موقع پر جماعت اسلامی سمیت مختلف سیاسی، مذہبی اور سماجی رہنماﺅں اور انسانی حقوق کی تنظیموں و سول سوسائٹی کے نمائندوں نے خطاب کیا۔ جماعت اسلامی کے سینئر رہنما اسداللہ بھٹو نے صوبائی دفتر کراچی میں منعقدہ تقریب سے خطاب کرتے ہوئے کہا کہ کشمیر پاکستان کا نامکمل ایجنڈا ہے، اس لیے تو قائداعظمؒ نے کشمیر کو پاکستان کی شہ رگ قرار دیا تھا، اس لیئے کشمیری عوام ناصرف اپنی آزادی بلکہ تکمیل پاکستان کی جنگ لڑ رہے ہیں، حکومتِ پاکستان کو ہر حوالے سے ان مظلوموں کی مدد کرنی چاہئے۔
صوبائی امیر کاشف سعید شیخ نے دادو پریس کلب پر یوم یکجہتی کشمیر ریلی سے خطاب کرتے ہوئے کہا کہ ہمارے حکمران سالہا سال سے بھارت سے مذاکرات کی بھیک مانگ رہے ہیں اور بھارت مستقل ہٹ دھرمی کا مظاہرہ کر رہا ہے، بھارتی قیادت کے رویئے نے یہ ثابت کر دیا ہے کہ اس سے بات کرنا بھینس کے آگے بین بجانے سے بڑھ کر کچھ نہیں، کشمیر کی آزادی کیلئے مودی سے مذاکرات کی بھیک مانگنے کی بجائے غیرت اور جرآت مند قیادت کی ضرورت ہے۔ دیگر مقررین نے مسئلہ کشمیر کو اجاگر اور بھارتی مظالم کی مذمت کرتے ہوئے کہا کہ بھارت نے کشمیر کی خصوصی حیثیت ختم اور 2009ء دنوں سے کرفیو لگا کر دنیا کی سب سے بڑی جیل میں تبدیل اور جنت نظیر وادی کو جہنم بنا کر رکھ دیا ہے۔ مقررین نے زور دیا کہ اقوام متحدہ کی منظور کردہ قرراردادوں کے مطابق کشمیری عوام کو اپنا حق خود ارادیت اور جنت نظیر کشمیر پر قابض بھارتی فوج کے مظالم سے نجات دلائی جائے۔
ذریعہ: Islam Times
کلیدی لفظ: یکجہتی کشمیر جماعت اسلامی
پڑھیں:
جماعت اسلامی کی پرامن غزہ مارچ کی یقین دہانی، فیض آباد کو ٹریفک کیلئے کھولنے کا فیصلہ
اسلام آباد(ڈیلی پاکستان آن لائن ) جماعت اسلامی کی فلسطینیوں سے اظہار یکجہتی کے لئے پر امن غزہ مارچ کرنے کی یقین دہانی پر فیض آباد انٹرچینج کو ہر قسم کی ٹریفک کے لئے کھولنے کا فیصلہ کیا گیا ہے۔
نجی ٹی وی جیو نیوز کے مطابق ضلعی انتظامیہ کا کہنا ہے کہ جماعت اسلامی نے ایکسپریس وے پر پرامن مارچ کی یقین دہانی کرائی ہے جس کے بعد فیض آباد کو عام ٹریفک کے لئے کھولنے کا فیصلہ کیا ہے۔
ضلعی انتظامیہ کے مطابق رابطہ سڑکیں بند ہونے سے ٹریفک کی روانی شدید متاثر رہی تاہم جماعت اسلامی کی پرامن احتجاج کی یقین دہانی کے بعد ہیوی مشینری کی مدد سے تمام کنٹینرز ہٹانے کا عمل شروع کر دیا ہے۔
دوسری جانب وفاقی دارالحکومت میں ریڈزون کے داخلی راستوں پر سکیورٹی تاحال انتہائی سخت ہے، ڈی چوک، سرینا چوک کو کنٹینرز لگا کر بند کر دیا گیا ہے، ریڈ زون کے داخلی و خارجی راستوں پر خار دار تاریں اور بیرئیرز لگا دیے گئے ہیں اور وفاقی دارالحکومت میں کسی بھی غیر قانونی اجتماع پر پابندی ہے۔اسلام آباد ٹریفک پولیس کا کہنا ہے کہ سری نگر ہائی وے پر غیر معمولی سکیورٹی انتظامات ہیں لہٰذا شہری سری نگر ہائی وے سے منسلک سروس روڈ کا استعمال کریں
ٹریفک پولیس کے مطابق بلیو ایریا، سیکٹر ایف 6، ایف 7 کے لئے ایچ 8 انڈر پاس استعمال کیا جائے، سیکٹر آئی اور ایچ کے لئے راولپنڈی پشاور روڈ، آئی جے پی روڈ سے سروس روڈ استعمال کریں۔
مختلف شہروں سے جماعت اسلامی کے قافلے غزہ مارچ میں شرکت کے لئے اسلام آباد کی جانب رواں دواں ہیں اور راستوں کی بندش کے حوالے سے سیکرٹری اطلاعات جماعت اسلامی اسلام آباد عامر بلوچ کا کہنا ہے کہ مارچ کا مقصد غزہ کے مظلوموں سے اظہار یکجہتی کرنا ہے، راستوں کی بندش ہمارے حوصلے پست نہیں کر سکتی۔دوسری جانب وفاقی وزیر داخلہ محسن نقوی اور وزیر مملکت برائے داخلہ طلال چودھری نے سیکرٹری جنرل جماعت اسلامی لیاقت بلوچ سے ٹیلی فونک رابطہ کیا۔
اس حوالے سے جماعت اسلامی کی جانب سے جاری اعلامیے میں بتایا گیا کہ دونوں وفاقی وزرا سے آج اسلام آباد میں یکجہتی فلسطین مارچ کے حوالے سے گفتگو ہوئی۔لیاقت بلوچ کا کہنا تھاکہ حکومت کو کوئی حق نہیں کہ فلسطینیوں سے اظہار یکجہتی مارچ کو روکے، جماعت اسلامی کا فلسطین سے اظہار یکجہتی مار چ پرامن ہو گا، حکومت رکاوٹیں کھڑی کرکے پوری دنیا میں رسوا نہ ہو۔
رہنما جماعت اسلامی کا کہنا تھاکہ حکومت آج اسلام آباد میں یکجہتی فلسطین ریلی روکنے سے اجتناب کرے، فلسطین سے اظہار یکجہتی کیلئے کوئی نوگوایریا نہ بنایا جائے۔لیاقت بلوچ کا کہنا تھاکہ کویت کا اسرائیل سے تعلقات ختم کرنے کا اعلان پوری امت کی ترجمانی ہے۔
سکردو کا فلائٹ آپریشن بحال، گلگت کی آج بھی 4 پروازیں منسوخ
مزید :
وہاڑی: چھوٹا طیارہ گر کر تباہ