اللہ سے کرے دور تو تعلیم بھی فتنہ
اشاعت کی تاریخ: 3rd, February 2025 GMT
بلاشبہ علم انسان کو دیگر مخلوقات سے ممتاز کرتا ہے۔ علم عزت و شرافت اور دارین کی سعادت سے بہرہ مند ہونے کا بہترین ذریعہ ہے، یہی بنیادی وجہ ہے کہ اسلام نے اپنے ظہور کے اول روز سے ہی حضرت محمدﷺ پر ’اقرا‘ کا حکم دے کر جہالت کی تاریکیوں میں علم کی عظمت و اہمیت کو اجاگر کیا۔ کسی بھی قوم کو مجموعی طور پر دین سے روشناس کرانے، تہذیب و ثقافت سے بہرہ ور کرنے اور خصائل فاضلہ و شمائلِ جمیلہ سے مزین کرنے میں اس قوم کی خواتین کا کردار مرکزی اور اساسی ہوتا ہے اور قوم کے نونہالوں کی صحیح نشوو نما میں ان کی مائوں کا اہم کردار ہوتا ہے اسی وجہ سے کہا گیا ہے کہ ماں کی گود بچے کا اولین مدرسہ ہے۔ بقول شاعر
اصلاح قوم آپ کو منظور ہو اگر
بچوں سے پہلے مائوں کو تعلیم دیجئے
اسی لیے دینِ اسلام نے شروع سے ہی جس طرح مردوں کے لیے تعلیم کی تمام تر راہیں وا رکھیں ہیں بالکل اسی طرح اسلام خواتین کے بھی تمدنی، معاشرتی اور ملکی حقوق کے ساتھ ساتھ تعلیمی حقوق کو تسلیم کرتے ہوئے ان کے عملی سطح پر ادا کرنے کا بھی حد سے زیادہ اہتمام کرتا ہے اور مرد و زن کی تعلیم و تربیت کے حدود و قیود بھی مقرر کرتا ہے۔ چنانچہ ہر دور میں مردوں کے شانہ بشانہ دخترانِ اسلام میں ایسی باکمال خواتین بھی جنم لیتی رہیں جنہوں نے اطاعت گزار بیٹی، و فا شعار بیوی اور سراپا شفقت بہن کا کردار نبھانے کے ساتھ ساتھ دنیا میں اپنے علم و فضل کا ڈنکا بجایا اور ان کے دم سے تحقیق و تدقیق کے لاتعداد خرمن آباد ہوئے۔ اسلام نے خواتین کو ہر قسم کے مفید علم کے حصول کی نا صرف آزادی دی بلکہ اس کی حوصلہ افزائی بھی کی ہے۔ لیکن دینِ اسلام بے پردگی کی اجازت کسی بھی صورت میں نہیں دیتا، فرمانِ باری تعالیٰ ہے: ’اے نبی آپﷺ فرما دو، مومن مردوں کو اپنی نگاہیں نیچی رکھیں اور مومن عورتوں سے فرما دو نگاہیں نیچی رکھیں‘۔
علم حاصل کرنے کے بارے میں دینِ اسلام کی تعلیمات انتہائی واضح اور دو ٹوک ہیں۔ دورِ حاضر میں ہمارے معاشرے میں تعلیم سے متعلق کئی ایک مسائل پریشانی کا سبب ہیں۔ ان تمام مسائل میں ایک اہم مسئلہ مخلوط تعلیم کا ہے، یہ نظام ِ تعلیم گزشتہ کئی عشروں سے ہمارے ہاں موضوعِ بحث بنا ہوا ہے۔ مخلوط تعلیم کا نظام ہمارے ہاں مغرب سے آیا ہے اور ہم اس بات سے باخوبی واقف ہیں کہ مخلوط تعلیم مغربی تہذیب و ثقافت کا اہم جزو ہے۔ برصغیر میں انگریزوں نے اپنی حکومت کو مستحکم کرنے کے لیے جو نظام ِتعلیم نافذ کیا تھا وہ مکمل طور پر مغربی تہذیب کا آئینہ تھا اور اس کا مقصد مسلمانوں کی نئی نسل کو مغربی تہذیب و تمدن کا نمونہ بنانا تھا اور وہ بہت حد تک اپنی اس کوشش میں کامیاب بھی رہے، آج ہماری اکثریت ان کی اندھی تقلید کرتی دکھائی دیتی ہے۔ مغربی معاشرے میں مرد و خواتین میں بہت زیادہ فرق نہیں سمجھا جاتا، مغرب کی عورت مرد کے شانہ بشانہ زندگی کے تمام امور سرانجام دیتے ہوئے ترقی کی دوڑ میں اس کے ساتھ برابر کی شریک ہے مگر ہمارے معاشرے میں بہت ساری مذہبی اور ثقافتی قدریں مخلوط تعلیم کی اجازت نہیں دیتیں۔ مغرب کی تہذیب نے جس طرح سے عورتوں کو اپنے گھر اور بچوں سے دور دفاتر میں لا بٹھایا۔ ایک مدت سے ہمارے ہاں مخلوط نظام ِ تعلیم رائج ہے اور ہماری اکثریت اس نظام ِ تعلیم کے مضر پہلو سے غافل ہے۔ مخلوط نظام ِ تعلیم تعلیمی معیار کو بلند کرنے کے بجائے پستی کا سبب بن رہا ہے۔ اگر موجودہ معاشرے کا جائزہ لیا جائے تو مخلوط نظام ِ تعلیم کے تباہ کن اثرات کی ایک لمبی فہرست ملتی ہے مخلوط نظام ِ تعلیم کا سب سے بُرا اثر اخلاق پر پڑ رہا ہے، شرم و حیا جو انسانوں کا سب سے بہترین اور قیمتی گہنا ہے معاشرے سے رخصت ہوتا جا رہا ہے۔ ہمارے نوجوان مخلوط نظام ِ تعلیم کی وجہ سے ایسے معاملات اور الجھنوں کا شکار ہیں جو ان کے بہتر مستقبل کیلئے مسلسل خطرے کا باعث ہے۔ ہمارا موجودہ مخلوط تعلیمی نظام طالبات میں جس شخصیت، صلاحیت اور ذہنیت کی تشکیل کر رہا ہے وہ مخصوص فرائض ادا کرنے کی تربیت نہیں بلکہ ہر میدان میں مردوں سے مسابقت، برابری اور مردوں کے دائرہ کار میں اپنی صلاحیتوں کا جوہر دکھانے کی ذہنیت ہے اور اس تعلیم کے نتیجے میں مجموعی طور پر طالبات مرد بن کر کچھ کر دکھانے میں ناکام رہتی ہیں مگر وہ اپنے مدارِ حیات سے بھی ٹوٹ جاتی ہیں نتیجتاً خاندانی نظام کی بنیادیں ہل جاتی ہیں۔
اسلام صرف مسلمانوں کے لیے نہیں بلکہ اس دنیا میں سکونت پذیر تمام لوگوں کے لیے بلا تفریق سرچشمہ ہدایت ہے۔ دینِ اسلام ایک مکمل ضابطہ حیات ہے اور اس کی نظر میں مخلوط تعلیمی نظام جائز نہیں۔ حیا عورت کا زیور اور مرد کی غیرت ہے۔ شریعتِ مطہرہ ایک پاکیزہ معاشرے کی تکمیل کے لیے معاشرے کے ہر فرد کو پابند کرتی ہے کہ وہ بد نگاہی اور بے حیائی سے دور رہیں۔ ہمارا سماجی نظام مخلوط تعلیم کے لیے راس نہیں۔ مخلوط تعلیمی نظام ایک عظیم فتنہ اور فکری و عملی برائیوں کو بڑھاوا دینے کا سب سے بڑا ذریعہ ہے۔ جیسے حضرت جنید بغدادی ؒ کا قول ہے، ایک دفعہ ان سے پوچھا گیا، کیا کوئی مرد کسی (غیر محرم) لڑکی کو پڑھا سکتا ہے؟ تو آپ نے فرمایا، اگر پڑھانے والا با یزید بسطامی ہو پڑھنے والی رابعہ بصری ہو جس جگہ پڑھایا جا رہا ہو وہ بیت اللہ ہو اور جو کچھ پڑھایا جا رہا ہو وہ کلام اللہ ہو پھر بھی جائز نہیں۔ مخلوط تعلیم نظام کے ساتھ دورِ حاضر کے والدین اپنی اولاد کی ضروریات پوری کرنے کیلئے دن رات محنت کرتے ہیں، ان کو ہر سہولت مہیا کرتے ہیں مگر اس سب میں وہ ذہنی اور جسمانی طور پر اتنے تھک جاتے ہیں کہ پھر اپنے بچوں کی اخلاقیات کی طرف توجہ نہیں دے پاتے۔ مخلوط نظام ِ تعلیم دورِ حاضر کا ایک انتہائی اہم مسئلہ ہے جس پر حکومت اور والدین دونوں کو ہی غور و فکر کرنے کی اشد ضرورت ہے۔ تعلیم خواتین کا حق ہے مگر ان کی تعلیم وہی ہو جو ان کی فطرت، ان کی لیاقت کے مناسب ہو اور ان کی عفت و عصمت کی حفاظت میں ممد و معاون ہو۔۔۔ ایک متوازن اور اسلامی اقدار پر مبنی تعلیمی نظام وقت کی ضرورت ہے، جو اسلامی اخلاقیات، حیا اور سماجی حدود کا خیال رکھتے علمی ترقی کی راہ کو ہموار کرنے کے ساتھ ساتھ مضبوط، با کردار اور با وقار معاشرے کی بنیاد بنے۔
.ذریعہ: Nai Baat
کلیدی لفظ: مخلوط تعلیم تعلیمی نظام مخلوط نظام تعلیم کے کے ساتھ کرنے کے ہے اور کے لیے اور اس رہا ہے
پڑھیں:
گورننس سسٹم کی خامیاں
پاکستان میں طرز حکمرانی اور داخلی و خارجی معاملات پر مسلسل سوالات اٹھائے جاتے ہیں، اس نظام پر تنقید بھی کی جاتی ہے۔اسی کے ساتھ ملک کو سیکیورٹی و معاشی مسائل کا بھی سامنا ہے۔ اصل میں حکمران طبقہ حکمرانی کی فرسودگی کو یا تو سمجھنے کا ادراک نہیں رکھتے یا ان کی ترجیحات میں ان مسائل کا حل شامل نہیں ہے۔
یہ ہی وجہ ہے کہ ہم عملاً حکمرانی کے نظام کے تناظر میں متعدد تجربات کے باوجود ناکامی کا شکار ہیں۔ اسی طرح ہم دنیا میں ہونے والے بہتر حکمرانی کے تجربات کی بنیاد پر بھی سیکھنے کے لیے تیار نہیں ہیں۔ انتہا پسندی اور دہشت گردی سے نمٹنے کے تناظر میں طرز حکمرانی کے مسائل کی اسٹیبلشمنٹ نے بھی نشاندہی کی تھی اور ان کے بقول اگر ہم نے گورننس کے بحران کو ترجیح بنیادوں پر حل نہ کیا تو دہشت گردی سے نمٹنا بھی آسان نہیں ہوگا ۔
حالیہ دنوں میں آئی ایم ایف کے قانونی مشن نے اپنے 12 روزہ دورے کا اختتام کیا ہے۔ یہ تفصیلی رپورٹ اس برس اگست میں آنے کی توقع ہے۔یہ رپورٹ کرپشن کی امکانات کو ختم کر کے اور میرٹ کی بنیاد پر فیصلوں کے ذریعے زیادہ شفافیت کو یقینی بنا نے اور پبلک سیکٹر کے نتائج کو بہتر بنانے کے لیے اپنی سفارشات پیش کرے گی۔
آئی ایم ایف نے اپنی ابتدائی رپورٹ میں اس بات کی نشاندہی کی ہے کہ پاکستان میں سیاست زدہ بیورو کریسی،کمزور احتساب پر مبنی نظام،قلیل مدتی اہداف پاکستان کی اہم خامیاں ہیں۔ان کے بقول پاکستان کے انتظامی ڈھانچے میں اہم افراد یا عہدے دار سیاسی وفاداریاں رکھتے ہیں اور اداروں کے سربراہوں کی تقرری بھی سیاسی بنیادوں پر ہوتی ہے۔اسی طرح پاکستان پاکستان میں بدعنوانی کے خلاف بھی کوئی مستقل پالیسی نہیں ہے ۔
آئی ایم ایف نے ابتدائی طور پر جن مسائل کی نشاندہی کی ہے وہ اہمیت رکھتے ہیں۔کیونکہ ہمارا بیوروکریسی پر مبنی نظام اپنی افادیت کھو چکا ہے اور اس نظام کی موجودگی میں گورننس کے نظام کی شفافیت کی توقع رکھنا محض خوش فہمی ہے۔اس بات کی درست طورپر نشاندہی کی گئی ہے کہ جب حکمران طبقہ انتظامی اداروں کو سیاسی بنیادوں پر چلائے گا یا اہم عہدوں پر میرٹ سے زیادہ سیاسی بنیادوں کو بنیاد بنا کر تقرریاں اور تبادلے کیے جائیں گے تو پھر نظام کی شفافیت کا سوال بہت پیچھے رہ جاتا ہے۔
آئی ایم ایف نے کمزور احتساب کے نظام کی بھی نشاندہی کی ہے۔ ہمارے بہت سے سیاسی پنڈت یا دانشور یا کاروباری طبقات کے بڑے افراد کرپشن کو ایک بڑا مسئلہ سمجھنے کے لیے تیار ہی نہیں ہیں۔ان کے بقول سرمایہ دارانہ نظام میں کرپشن اس نظام کا حصہ ہے اور ہمیں اس کو قبول کرنا ہی ہوگا۔
یہ ہی وجہ ہے کہ یہاں جب بھی کرپشن کی یا احتساب پر مبنی نظام کی بات کی جاتی ہے تو یہ سارا عمل سیاسی طور پر متنازعہ بن جاتاہے یا اس کو متنازعہ بنادیا جاتا ہے۔پاکستان میں کرپشن کے خاتمے کے لیے جو بھی ادارے بنائے گئے ہیں وہ خود بھی کرپشن کا شکار ہیںیا ان پر اس حد تک سیاسی دباؤ ہے کہ وہ شفافیت کی بجائے سیاست کا شکار ہوتے ہیں۔
پاکستان میں گورننس کے مسائل محض آئی ایم ایف کی پیش کردہ نکات تک محدود نہیں ہیں بلکہ اور بھی مسائل ہمیں حکمرانی کے نظام میں درپیش ہیں۔مثال کے طور پر عدم مرکزیت کے مقابلے میں مرکزیت پر مبنی نظام جہاں اختیارات کا مرکز کسی ایک سطح تک محدود ہوتا ہے یا ہم سیاسی، انتظامی اور مالی اختیارات کو نچلی سطح پر منتقل کرنے کے لیے تیار ہی نہیں ہیں۔
اسی طرح سے پاکستان میں حکمرانی کے نظام میں موجود جو سائز آف گورننس ہے وہ ریاستی اور حکومتی نظام پر نہ صرف سیاسی اور انتظامی بوجھ ہے بلکہ اس کی بھاری مالیاتی قیمت بھی ہمیں ادا کرنی پڑ رہی ہے۔
بے تحاشہ ادارے،محکمے اور ان کے سربراہان کی فوج در فوج سے نہ تو عوام کے مسائل حل ہوتے ہیں اور نہ یہ موجودہ نظام میں کوئی شفافیت کا عمل پیدا کر سکے ہیں۔دنیا کے جدید حکمرانی کے نظام میں نچلی سطح پر موجود مقامی حکومتوں کے نظام کو بنیادی اہمیت حاصل ہے۔لیکن ہم مسلسل مقامی حکومتوں کو نظر انداز کررہے ہیں۔
حالانکہ پاکستان کے آئین میں اس وقت بھی تین سطحوں پر حکومت کا تصور موجود ہے یعنی وفاقی،صوبائی اور مقامی حکومتیں لیکن اس کے باوجود ہمارا ریاستی نظام مقامی حکومتوں کی عدم موجودگی کا شکار نظر آتا ہے۔مقامی حکومتوں کے نظام کی عدم موجودگی بنیادی طور پر ریاست،حکومت اور عوام کے درمیان ایک بڑی خلیج کو پیدا کرتی ہے اور یہ خلیج ان فریقوں میں بد اعتمادی کے ماحول کو پیدا کرنے کا سبب بھی بنتی ہے۔
بااختیار مقامی حکومتی نظام معاشرے میں موجود کمزور اور محروم طبقات کے مسائل کے حل میں کلیدی کردار ادا کرتا ہے۔لیکن ہمارا حکمرانی کا نظام طبقاتی تقسیم کا شکارہے اور اس تقسیم میں طاقتور طبقات کے مفادات کو خاص اہمیت حاصل ہوتی ہے۔جب کہ اس کے مقابلے میں کمزور طبقات مختلف سطح پر استحصال کاشکار ہوتے ہیں۔
18 ویں ترمیم کی منظوری کہ باوجود بھی ہم صوبائی یا مقامی سطح پر حکمرانی کے نظام سے جڑے مسائل حل نہیں کر سکے ہیں۔ماضی میں وفاق کا نظام مرکزیت پر مبنی تھا تو آج صوبائی حکومتوں کا نظام صوبائی مرکزیت کا شکار نظر آتا ہے۔
اس طرز عمل کی وجہ سے صوبوں میں موجود ضلعوں کا نظام نہ صرف کمزور ہے بلکہ اپنی افادیت کھوتا جا رہا ہے۔ایک طرف سیاسی نظام میں موجود سیاسی طاقتور افراد ہیں جو قومی اور صوبائی اسمبلی کے ارکان کی صورت میں سیاسی نظام پر قابض نظر آتے ہیں تو دوسری طرف بیوروکریسی ہے جو نظام کی شفافیت میں خود بھی رکاوٹ بنی ہوئی ہے۔
اسی طرح سے ہمیں سیاسی اور بیوروکریسی پر مبنی نظام کا ایک ایسا کٹھ جوڑ بالادست نظر آتا ہے جو عوامی مفادات سے زیادہ اپنے ذاتی سطح کے مفادات کو ترجیح دیتا ہے۔ہمارے ہاں وفاقی،صوبائی اور مقامی حکومتوں کے ادارے اپنے اپنے سیاسی، آئینی اور قانونی دائرہ کار میں کام کرنے کے عادی نہیں ہیں۔
ایک دوسرے کے دائرہ کار میں مداخلت کرنا ہمارے نظام کی اہم خصوصیت بن چکی ہے۔قومی اور صوبائی اسمبلی کے ارکان کی دلچسپی قانون سازی یا پالیسی سازی کی شفافیت کی بجائے ترقیاتی فنڈ تک محدود ہوتی ہے اور اس وجہ سے قومی اور صوبائی اسمبلی کے ارکان خود بھی ایک مضبوط اور مربوط مقامی حکومتوں کے نظام کے عملی طور پر خلاف ہیں ۔
ایک طرف ہم اپنے نظام کو عوام کے منتخب نمائندوں کی بنیاد پر چلانا چاہتے ہیں تو دوسری طرف ہماری ترجیحات عوام کے منتخب نمائندوں کے مقابلے میں بیوروکریسی پر حد سے بڑھتا ہواانحصار ہے۔یہ ہی وجہ ہے کہ خود ارکان اسمبلی موجودہ نظام سے ناخوش نظر آتے ہیں۔
ہم عملاًحکومتوں کے مقابلے میں یا منتخب نمائندوں کے ساتھ مل کر کام کرنے کی بجائے کمپنیوں اوراتھارٹیوں کی بنیاد پر صوبوں کے نظام کوچلانااپنی ترجیح سمجھتے ہیں۔یہ دوہرے معیارات اورمختلف تضادات پر مبنی پالیسیوں نے حکمرانی کے نظام کواور زیادہ مشکل بنا دیا ہے۔
یہ نظام جہاں اپنی افادیت کھوتا جا رہا ہے وہیں اس کی ساکھ پر بھی بنیادی نوعیت کے سوالات اٹھائے جارہے ہیں۔حکمران طبقات کی سیاسی اور معاشی پالیسیوں یا ان کی پسند پر مبنی حکمرانی کا یہ نظام لوگوں کو سیاسی اور معاشی طور پر تنہا کر رہا ہے۔ان کو لگتا ہے کہ اس نظام میں بہتری کی گنجائش نہ ہونے کے برابر ہے ۔لیکن اس کے برعکس اگر ہم وفاقی اور صوبائی حکومتوں کے طرز عمل کو دیکھیں توان کے بقول ملک ترقی کی جانب گامزن ہے۔حکمرانوں اور عوام کی سوچ و فکر میں یہ تضاد ہمارے حکمرانی کے نظام کی خرابی کواور زیادہ نمایاں کرتاہے۔
کروڑوں روپے کا مبینہ فراڈ، نادیہ حسین ایف آئی اے کے نوٹس پر پیش