مطالعہ پاکستان میں مریم و کلثوم کا تذکرہ…
اشاعت کی تاریخ: 29th, January 2025 GMT
گذشتہ چند روز سے یہ بات زبان زدِ عام ہے کہ دہم جماعت کی مطالعہ پاکستان کے نئے ایڈیشن میں کلثوم نواز اور مریم نواز پر ایک مکمل باب یا تذکرہ شامل کیا گیا ہے جبکہ کتاب کے سرورق پر مریم نواز کی تصویر بھی شائع ہوئی ہے۔ ابلاغ کے مختلف پلیٹ فارم اور بعض صحافتی حلقوں کی جانب سے اس پر ’’تشویش‘‘ بھی سامنے آئی اور اس ضمن میں تنقید کے ساتھ ساتھ سوالات بھی اٹھائے گئے۔ اسی ’’تجسس‘‘ نے مجھے کتاب کی ورق گردانی پر مجبور کیا۔ میں نے مذکورہ اعتراضات کا بغور مشاہدہ کیا تو واضح ہوا کہ میٹرک کی مطالعہ پاکستان کے سرورق پر مریم نواز سمیت کسی کی بھی تصویر موجود نہیں۔ کتاب کا ٹائٹل پیج پاکستان کے چاروں صوبوں بشمول وفاق کی عکاسی کرتا دکھائی دے رہا ہے …… دوسری جانب اس میں خواتین کے کردار کے حوالے سے ایک باب پہلے سے موجود تھا، جس کا عنوان ’’وویمن امپاورمنٹ‘‘ ہے۔ یہ باب بے نظیر بھٹو سمیت 7 خواتین کے تذکرہ پر مشتمل تھا۔ یہ وہ بااختیار خواتین ہیں جن کا پاکستان کی قومی، سیاسی و سماجی ترقی میں کسی نہ کسی حوالے سے کردار رہا ہے۔ اس مخصوص باب میں فاطمہ جناح، بے نظیر بھٹو، شمشاد اختر (سابق گورنر سٹیٹ بنک آف پاکستان)، ارفع کریم، بلقیس ایدھی، ثمینہ بیگ (ماؤنٹ ایورسٹ سر کرنے والی پاکستان کی پہلی خاتون)، اقوام متحدہ میں سیکرٹری جنرل کے عہدے پر فائز رہنے والی دنیا کی پہلی خاتون ڈاکٹر نفیس صادق اور سندھ سے تعلق رکھنے والی سیاستدان ڈاکٹر فہمیدہ مرزا کا تعارف اور چند لائنوں میں خدمات بیان کی گئی ہیں۔
قابل ذکر امر یہ ہے کہ نئے شائع ہونے والے ایڈیشن میں کلثوم نواز اور مریم نواز کے علاوہ نصرت بھٹو کا تذکرہ بھی شامل کیا گیا ہے۔ ان کے علاوہ پاکستان کی پہلی خاتون چیف جسٹس لاہور ہائیکورٹ عالیہ نیلم، پاک فوج کی پہلی خاتون سرجن لیفٹیننٹ جنرل نگار جوہر کا اضافہ بھی ہوا ہے۔
یہاں یہ بات بھی واضح ہوئی کہ کتاب میں مریم نواز اور کلثوم نواز پر کوئی الگ باب شائع نہیں کیا گیا بلکہ پہلے سے موجود باب میں مزید بااختیار خواتین کا ذکر شامل ہوا ہے۔ یہ باب کلثوم نواز اور مریم نواز کا تذکرہ شامل کیے جانے سے پہلے بھی 2 صفحات پر مشتمل تھا اور اب بھی 2 صفحات پر ہی مشتمل ہے۔ دوسری جانب میں نے اس اضافے کا موازنہ دیگر خواتین کی تعارفی سطروں کے ساتھ کیا تو مزید واضح ہو اکہ مریم نواز اور کلثوم نواز پر صرف 4 لائنیں لکھی گئی ہیں۔ دیگر اہم خواتین کا تذکرہ بھی 3 سے 4 سطور کے درمیان ہے۔ ایسے میں صرف مریم نواز اور کلثوم نواز کو ہدف بنا کر اٹھائے جانے والے سوالات بے بنیاد ہیں۔ سیکرٹری سکولز ایجوکیشن خالد نذیر وٹو کے مطابق ان خواتین کا تذکرہ طالبات کے اندر موٹیویشن پیدا کرنے کا باعث ہے جو کہ غلط نہیں ہے۔ پنجاب ٹیکسٹ بک بورڈ کے مطابق یہ تبدیلی اس کورس میں تقریباً 3 سال بعد کی گئی ہے جبکہ اس ترمیم کی ضرورت نصاب کی ترجیحات اور ضروریات کو مدنظر رکھتے ہوئے محسوس کی گئی تھی۔
اب صورتحال یہ ہے کہ سارا شور اس بات پر ڈالا جا رہا ہے کہ نصاب میں کلثوم نواز اور مریم نواز کا تذکرہ کیوں، کیسے اور کس کے کہنے پر شامل کیا گیا۔ کسی نے سوال نہیں اٹھایا کہ نصرت بھٹو اور فہمیدہ مرزا کیوں اس چیپٹر کا حصہ ہیں …… یا، جسٹس عالیہ نیلم، ڈاکٹر نگار جوہر کا مطالعہ پاکستان کی کتاب میں کیا کام ہے؟۔ قابل ذکر امر یہ بھی ہے کہ یہ سوال میڈیا نمائندگان کے ساتھ ساتھ ان لوگوں کی جانب سے بھی اٹھایا جا رہا ہے جن کے محبوب قومی لیڈر کے ساتھ شادی کرنے والی ہر خاتون نے اس ”سادہ مزاج” کو اپنے اپنے مقصد کیلئے استعمال کیا اور اپنے ایجنڈے پر چلانے کی کوشش کی۔ جب ان کا لیڈر ڈٹا رہا، تو بیویوں سے اس کے راستے جدا ہوئے۔ اعتراض کرنے والے خود انصاف کر لیں کہ کیا ایسی خواتین نصاب کا حصہ بن سکتی ہیں جنہوں نے ایک قومی لیڈر کے ساتھ دھوکہ کیا ہو؟ اگر کوئی خاتون اس لیڈر کے ساتھ وفا کرتی اور خاتون اول رہتی تو یقینا وہ بھی اس کتاب کا حصہ بنتی…… مریم نواز کو پاکستان کی پہلی خاتون وزیر اعلیٰ بننے کا اعزاز حاصل ہے۔ کلثوم نواز نے سیاسی سفر میں اپنے شوہر کا بھرپور ساتھ دیا، کسی قدم پر دھوکہ نہیں دیا اور اتار چڑھاؤ کی تمام منازل میں شوہر کے ہم قدم رہیں۔
تعلیم کو سیاست سے دور رکھا جانا چاہئے۔ بالخصوص ایسے مواقع پر، جن میں طلبا کی ذہنی آبیاری ہو رہی ہو …… خدارا بچوں کو پڑھنے دیں …… ان کے ذہنوں کے دریچے کھلنے دیں۔ یہ بے بنیاد بحث ہے کہ کتاب میں کس کا تذکرہ کیوں شامل کیا گیا۔ ارباب اختیار و اقتدار کے معاملات درست کرنا ہیں، تو ایسے نکات پر کیجئے جن سے بچوں کا صحیح معنوں میں بھلا ہو۔ شعبہ تعلیم میں بے شمار عنوانات موجود ہیں جو توجہ کے متقاضی ہیں۔ سوشل میڈیا کے ’’ماہرین تعلیم‘‘ اس جانب توجہ دیں۔ ڈھائی کروڑ سے زائد بچے سکولوں سے باہر ہیں۔ انہیں پڑھنے کی جانب لانے کیلئے کچھ کریں …… اور جو پڑھ رہے ہیں انہیں پڑھنے دیں۔ خود کو لایعنی بحث میں الجھا کر اپنا اور دوسروں کا وقت برباد کرنے سے گریز کریں۔
.ذریعہ: Nai Baat
کلیدی لفظ: کلثوم نواز اور مریم نواز مطالعہ پاکستان شامل کیا گیا پاکستان کی کا تذکرہ کے ساتھ رہا ہے
پڑھیں:
وزیراعلیٰ پنجاب مریم نواز نے پلسر گولڈ اور آئرن پروجیکٹ سے متعلق جامع بزنس پلان طلب کرلیا
وزیراعلیٰ پنجاب مریم نوازشریف نے پلسر گولڈ اور آئرن پروجیکٹ سے متعلق جامع بزنس پلان طلب کرتے ہوئے مقامی اور غیرملکی سرمایہ کاروں کے لیے آسان اور قابل عمل منصوبہ تیار کرنے کی ہدایت کردی۔
مائنز اینڈ منرلز ڈیپارٹمنٹ کے جائزہ اجلاس کی صدارت کرتے ہوئے وزیراعلیٰ مریم نوازشریف کامعدنیات کے خزانے کی سرویلنس مؤثر بنانے کا حکم بھی دیا۔
یہ بھی پڑھیں: مریم نواز کا پنجاب میں الیکٹرک بسوں کا افتتاح، کرایہ صرف 20 روپے ہوگا
بریفنگ کے دوران وزیر اعلیٰ کو بتایا گیا کہ پنک سالٹ کو خام کی بجائے ویلیو ایڈڈ پروڈکٹس کی شکل میں ایکسپورٹ کو ترجیح دی جائے گی۔
راک سالٹ سے ویلیو ایڈڈ مصنوعات کے لیے اسپیشل اکنامک زون سمیت قائدآباد میں اسپیشل اکنامک زون کو 10 سال کے لیے ٹیکس فری قرار دینے کی تجاویز کا بھی جائزہ لیا گیا۔
مزید پڑھیں: وزیراعلیٰ مریم نوازشریف کا ’میگنیفیسنٹ پنجاب‘ میگا ٹورسٹ منصوبہ کیا ہے؟
بریفنگ کے دوران اجلاس کو بتایا گیا کہ قائد آباد اسپیشل اکنامک زون میں بنیادی انفرا اسٹرکچر بھی فراہم کیا جائے گا، چنیوٹ میں 261ملین ٹن آئرن اور کے معدنی ذخائر کا تخمینہ لگایا گیا ہے۔
بریفنگ میں بتایا گیا کہ پلسر گولڈ پروجیکٹ سے 33ہزار کلو گرام سونا حاصل کیاجاسکتا ہے، جس پر عملدرآمد کے لیے صوبائی انوائرمنٹ پروٹیکشن ایجنسی نے منطوری دے دی ہے۔
آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں
آئرن پروجیکٹ اسپیشل اکنامک زون انوائرمنٹ پروٹیکشن ایجنسی پلسر گولڈ پروجیکٹ پنک سالٹ سرویلنس مائنز اینڈ منرلز ڈیپارٹمنٹ مریم نواز شریف وزیر اعلیٰ پنجاب ویلیو ایڈڈ پروڈکٹس
غزہ کا گمنام ہیرو، پیاسوں تک پانی پہنچانے والا ابراہیم علوش