پیکا ایکٹ 2025 ترمیمی بل منظور، صحافتی تنظیموں کو کیا اعتراضات ہیں؟
اشاعت کی تاریخ: 23rd, January 2025 GMT
قومی اسمبلی نے پیکا ایکٹ 2025 ترمیمی بل کثرت رائے سے منظور کرلیا۔ اس بل کے خلاف صحافیوں نے آج قومی اسمبلی اجلاس سے واک آؤٹ کیا اور اجلاس کی کوریج چھوڑ کر پریس گیلری سے باہر چلے گئے۔ صحافیوں نے ’پیکا ایکٹ نامنظور‘ کے نعرے بھی لگائے۔ دوسری جانب صحافی تنظیموں کی جوائنٹ ایکشن کمیٹی نے پیکا ایکٹ میں ترامیم کا بل مسترد کرتے ہوئے کہا ہے کہ پیکا ایکٹ میں ترامیم صحافتی تنظیموں سے بغیر مشاورت کے کی جارہی ہیں۔
وی نیوز نے صحافتی تنظیموں کے نمائندوں سے گفتگو کی اور ان سے یہ جاننے کی کوشش کی کہ پیکا ایکٹ ترمیمی بل 2025 کی قومی اسمبلی کے منظوری پر ان کو کیا اعتراضات ہیں اور ان کا آئندہ کا لائحہ عمل کیا ہوگا۔
یہ بھی پڑھیں قومی اسمبلی نے پیکا ایکٹ 2025 ترمیمی بل کثرت رائے سے منظور کرلیا، صحافیوں کا واک آؤٹ
پاکستان فیڈرل یونین آف جرنلسٹ (پی ایف یو جے) کے صدر افضل بٹ نے وی نیوز سے گفتگو کرتے ہوئے کہاکہ ہمارے ساتھ حکومت کا وعدہ تھا کہ جب بھی میڈیا سے متعلق کوئی قانون لایا جائےگا تو اس سے قبل تمام اسٹیک ہولڈرز سے مشاورت کی جائےگی۔
انہوں نے کہاکہ میڈیا کی جوائنٹ ایکشن کمیٹی، پی بی اے، اے پی این ایس، سی پی این ای، ایمنڈ اور پی ایف یو جے پانچوں اسٹیک ہولڈر ہیں۔ ان میں سے کسی کے ساتھ کوئی رابطہ نہیں کیا گیا۔ اس لیے جوائنٹ ایکشن کمیٹی اس بل کو سختی سے مسترد کرتی ہے اور ہم نے یہ فیصلہ کیا ہے کہ اس کے خلاف ملک بھر میں احتجاجی تحریک چلائی جائے گی کیونکہ یہ پریس فریڈم پر سیدھا سیدھا حملہ ہے جس کو ہم برداشت نہیں کریں گے۔
افضل بٹ نے کہاکہ ہم نے ملک بھر سے اپنے عہدیداروں کی مشاورتی میٹنگ کل طلب کرلی ہے جس میں احتجاجی تحریک کی تاریخ کا اعلان کیا جائے گا اور مکمل لائحہ عمل جاری کیا جائےگا، ہمیں ترامیم کا اس وقت پتا چلتا ہے جب بل منظور ہونے سے پہلے ہمیں دیا جاتا ہے۔
صدر پی ایف یو جے نے کہاکہ اس بل کو حکومت نے ایک خفیہ دستاویز کے طور پر اپنے پاس رکھا اور کسی اسٹیک ہولڈر کے ساتھ شیئر بھی نہیں کیا۔ ہم نے حکومت کے اس بل کو منظور کرنے کے طریقہ کار کو سامنے رکھتے ہوئے اسے مسترد کرنے کا اعلان کیا ہے۔
انہوں نے کہاکہ ہم سمجھتے ہیں کہ اگر اس میں کوئی نیک نیتی کی بات نہیں تو مشاورت کرنے میں حرج کیا تھی، اگر اچھا کام تھا تو مشاورت کے بعد بھی ہو سکتا تھا، ہم یہ سمجھتے ہیں کہ یہ جو مشاورتی عمل نہیں کیا گیا اس کے پیچھے کوئی اور مقاصد ہیں۔
سابق صدر نیشنل پریس کلب انور رضا نے وی نیوز سے گفتگو کرتے ہوئے کہاکہ پیکا ایکٹ کو ملک بھر کی صحافتی تنظیمیں شروع دن سے مسترد کرتی ہیں، حکومت نے سوشل میڈیا کی آڑ میں پہلے ہی صحافیوں پر بہت سی پابندیاں عائد کردی ہیں، اب پہلے مقدمہ درج ہونے اور بعد میں انکوائری کرنے کا قانون بنایا گیا ہے۔
انہوں نے کہاکہ سوشل میڈیا کے لیے حکومت ڈیجیٹل اتھارٹی لانے جارہی تھی تو اس پیکا ایکٹ میں ترمیم کیوں کی گئی، صحافی اگر کوئی سوشل میڈیا یا یوٹیوب چینل استعمال کرتا ہے تو ذمہ داری کے ساتھ کرتا ہے۔
انور رضا نے کہاکہ حکومت کے اس اقدام پر ہم عدالت سے رجوع کریں گے اور احتجاج تو آج سے ہی شروع ہوگیا ہے۔ آج بھی ہم نے قومی اسمبلی کی کارروائی کا بائیکاٹ کیا۔
یہ بھی پڑھیں پیکا ایکٹ عدالت نے پی ٹی آئی رہنما رؤف حسن کو رہا کرنے کا حکم دے دیا
سابق صدر نیشنل پریس کلب نے کہاکہ وزیر اطلاعات عطااللہ تارڑ نے صحافیوں کو تحفظات دور کرنے کی یقین دہانی بھی کرائی ہے، اب کل پی ایف یو جے اور دیگر تنظیموں کے ساتھ مل کر آئندہ کے لائحہ عمل کا اعلان کیا جائےگا۔
آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں
wenews پیکا ایکٹ ترمیمی بل منظور ڈیجیٹل اتھارٹی سوشل میڈیا صحافتی تنظیمیں سراپا احتجاج صحافیوں کے اعتراضات وزیر اطلاعات وی نیوز.ذریعہ: WE News
کلیدی لفظ: پیکا ایکٹ ترمیمی بل منظور ڈیجیٹل اتھارٹی سوشل میڈیا صحافتی تنظیمیں سراپا احتجاج صحافیوں کے اعتراضات وزیر اطلاعات وی نیوز پی ایف یو جے قومی اسمبلی سوشل میڈیا پیکا ایکٹ نے کہاکہ کے ساتھ
پڑھیں:
کینالز تنازع پر ن لیگ پیپلزپارٹی آمنے سامنے، کیا پی ٹی آئی کا پی پی پی سے اتحاد ہو سکتا ہے؟
دریائے سندھ سے کینالز نکالنے کے معاملے پر پاکستان پیپلز پارٹی اور مسلم لیگ ن آمنے سامنے ہیں۔ جمعہ کو حیدر آباد میں جلسے سے خطاب کرتے ہوئے چئیرمین پیپلز پارٹی بلاول بھٹو نے کہاکہ پانی کی تقسیم کا مسئلہ وفاق کو خطرے میں ڈال سکتا ہے، اسلام آباد والے اندھے اور بہرے ہیں، یہ نہ سننے کو تیار ہیں اور نہ ہی دیکھنے کے لیے تیار ہیں، ہم وزارتوں کو لات مارتے ہیں، کینالز منصوبہ کسی صورت منظور نہیں ہے۔
انہوں نے کہاکہ وفاقی حکومت فوری طور پر اپنا متنازع کینالز کا منصوبہ روکے، ورنہ پیپلز پارٹی ساتھ نہیں چل سکتی۔
یہ بھی پڑھیں متنازع کینالز منصوبہ: نواز شریف اور شہباز شریف کی پیپلزپارٹی کے تحفظات دور کرنے کی ہدایت
اس ساری صورتحال میں اگر پیپلز پارٹی حکومت کی حمایت سے دستبردار ہو جاتی ہے تو سوال یہ پیدا ہوتا ہے کہ کیا پیپلز پارٹی اور پی ٹی آئی اکٹھی ہو سکتی ہیں؟ اور یہ ممکنہ اتحاد پی ٹی آئی کے لیے کم بیک کرنے میں کتنا مفید ثابت ہو سکتا ہے؟
کینالز کے معاملے پر اختلاف پیپلزپارٹی اور اسٹیبلشمنٹ میں ہوگا، ماجد نظامیسیاسی تجزیہ کار ماجد نظامی نے کہاکہ پیپلز پارٹی اس وقت مشکل صورتحال سے اس لیے دوچار ہے کیونکہ 9 فروری کے بعد سے لے کر اب تک وہ وفاقی حکومت پر تنقید تو کرتے تھے، لیکن ساتھ شامل بھی تھے، لیکن اب معاملہ تھوڑا مختلف ہے کیوں کہ کینالز کے معاملے پر یہ اختلاف پیپلز پارٹی اور اسٹیبلشمنٹ میں ہوگا۔
انہوں نے کہاکہ اس کے علاوہ سندھ میں قوم پرستوں کے مؤقف کی وجہ سے بھی پیپلز پارٹی کو سیاسی طور پر مشکل کا سامنا ہو سکتا ہے، اس لیے وفاقی حکومت پر پیپلز پارٹی تنقید تو کررہی ہے، لیکن ان کے اصل مخاطب اسٹیبلشمنٹ کے افراد ہیں، کیونکہ کینالز جو خصوصاً پنجاب میں آئیں گی، وہ ماڈرن فارمنگ کے ایریاز کے لیے تشکیل دی جا رہی ہیں۔
’براہِ راست اسٹیبلشمنٹ کو مخاطب کرنا پیپلز پارٹی کے لیے ذرا مشکل ہے‘انہوں نے سیاسی صورتحال پر بات کرتے ہوئے کہاکہ چونکہ سیاسی صورتحال پر براہِ راست اسٹیبلشمنٹ کو مخاطب کرنا پیپلز پارٹی کے لیے ذرا مشکل ہے، اس لیے وہ وفاقی حکومت پر تنقید کررہے ہیں، لیکن یہ معاملہ پیپلز پارٹی بمقابلہ اسٹیبلشمنٹ ہے، اس سے مسلم لیگ ن کا کوئی تعلق نہیں۔
ایک سوال کے جواب میں ماجد نظامی نے کہاکہ پیپلزپارٹی اور پی ٹی آئی کے درمیان اتحاد کا کوئی امکان نہیں، کیوں کہ نہروں کے معاملے پر پیپلزپارٹی کی یہ لڑائی مسلم لیگ ن سے نہیں بلکہ اسٹیبلشمنٹ سے ہے۔
انہوں نے کہاکہ پاکستان میں کوئی ایسی حکومت تشکیل نہیں پا سکتی جس کو اسٹیبلشمنٹ کی حمایت حاصل نہ ہو، اس لیے پی ٹی آئی اور پیپلز پارٹی کے اتحاد کا معاملہ ذرا مشکل نظر آتا ہے۔
کینالز کے معاملے پر پیپلزپارٹی اور ن لیگ کی نشست کامیاب نہیں ہوسکی، احمد بلالتجزیہ کار احمد بلال نے کہاکہ سندھ تو پہلے سے ہی شور مچاتا آرہا ہے کہ انہیں پانی کم ملتا ہے، اگر اب ایسی صورت میں نہریں بھی نکلیں گی تو ان کے ساتھ زیادتی ہوگی، اسی لیے پیپلزپارٹی سمیت دیگر سیاسی جماعتیں باقاعدہ مہم چلا رہی ہیں۔
انہوں نے کہاکہ متنازع کینالز منصوبے کے حوالے سے پیپلزپارٹی اور مسلم لیگ ن کے درمیان ہونے والی نشست کامیاب نہیں ہو سکی، جس کی وجہ سے یہ مسئلہ مزید بڑھتا جارہا ہے، اور بلاول بھٹو نے یہاں تک کہہ دیا ہے کہ اگر انہوں نے ساتھ چھوڑ دیا تو یہ حکومت نہیں چل سکے گی۔
ایک سوال کے جواب میں انہوں نے کہاکہ پاکستان پیپلزپارٹی کبھی بھی مسلم لیگ ن کے ساتھ اتحاد نہیں کرےگی، ان کے مسلم لیگ ن کے ساتھ معاملات حل ہو جائیں گے، اس وقت جو کچھ ہورہا ہے یہ صرف ایک پریشر ہے۔
’پیپلزپارٹی حکومتی حمایت سے دستبردار ہوگئی تو مرکز میں انتخابات دوبارہ ہوں گے‘انہوں نے مزید کہاکہ اگر پیپلز پارٹی حکومت سے علیحدگی اختیار کرتی ہے تو وفاق کی یہی صورتحال ہوگی کہ انتخابات دوبارہ ہوں گے، اور ایسی صورت میں مسائل مزید بڑھ سکتے ہیں کیوں کہ اس وقت ملک درست سمت میں گامزن ہو چکا ہے، اور معیشت ٹریک پر آگئی ہے۔
انہوں نے کہاکہ پاکستان کی حکومت اور اسٹیبلشمنٹ یہ افورڈ نہیں کر سکتے کہ اس وقت دوبارہ سے سے انتخابات کروائے جائیں، بلاول بھٹو نے جلسے میں جو کہا یہ صرف بیان کی حد تک تھا۔
انہوں نے کہاکہ صدر مملکت آصف زرداری منجھے ہوئے سیاست دان ہیں، وہ جانتے ہیں کہ کیسے آگے بڑھنا ہے، کیسے پریشر ڈالنا ہیں اور مطالبات منوانے کے لیے کیا آپشن استعمال کرنے ہیں۔
نہروں کا معاملہ پیپلزپارٹی کے لیے اہمیت کا حامل ہے، رانا عثمانسیاسی تجزیہ کار رانا عثمان نے بتایا کہ نہروں کا مسئلہ پیپلزپارٹی کے لیے نہایت اہمیت کا حامل ہے، چونکہ اس کا سارا ووٹ بینک سندھ میں ہے، اور وہاں پر ان کی حکومت بھی ہے۔
انہوں نے کہاکہ پانی کے معاملے پر سندھ کے عوام بہت جذباتی ہیں، کالا باغ ڈیم کے معاملے پر یہ چیز واضح بھی ہو چکی ہے، کچھ بھی ہو جائے پیپلزپارٹی نہریں نکالنے کے معاملے پر راضی نہیں ہو سکتی۔
رانا عثمان نے کہاکہ بلاول بھٹو کی جانب سے حکومت کا ساتھ چھوڑنے کی دھمکی ایک سیاسی پریشر ہے، وہ بخوبی جانتے ہیں کہ اگر وہ ایسا کرتے ہیں تو جمہوریت کے لیے کیا خطرات ہوں گے۔
یہ بھی پڑھیں حکومت متنازع نہری منصوبہ روکے ورنہ ساتھ نہیں چل سکتے، بلاول بھٹو نے شہباز شریف کو خبردار کردیا
انہوں نے کہاکہ پیپلزپارٹی سمجھتی ہے کہ ملک اس وقت نئے انتخابات کا متحمل نہیں ہو سکتا، کیونکہ پاکستان کی معاشی صورتحال ہی ایسی ہے، اس لیے پیپلزپارٹی حکومت کی حمایت سے دستبردار نہیں ہوگی۔
آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں
wenews آصف زرداری بلاول بھٹو پی ٹی آئی پی پی پی اتحاد پیپلزپارٹی شہباز شریف عمران خان کینالز معاملہ مسلم لیگ ن نواز شریف وی نیوز
سنگاپور میں پارلیمنٹ تحلیل، عام انتخابات 3 مئی کو ہوں گے